ایسٹر سے قبل سری لنکا کے چرچ پر فائرنگ، حملہ آور گرفتار

کولمبو (ڈیلی اردو/اے ایف پی) ایسٹر کی تقریبات سے قبل سری لنکا کے شمال مشرقی علاقے میں ایک چرچ کو مسلح حملے کا نشانہ بنایا گیا۔ واقعے میں کوئی جانی نقصان نہیں ہوا، تاہم سیکیورٹی خدشات کے باعث ملک بھر میں ہائی الرٹ نافذ کر دیا گیا ہے۔

پولیس کے مطابق فائرنگ کا واقعہ دارالحکومت کولمبو سے 160 کلومیٹر شمال مشرق میں واقع علاقے منامپیتیا کے ایک چرچ میں پیش آیا، جہاں ایک مسلح شخص نے چرچ کی عمارت پر فائرنگ کی۔ واقعے میں کھڑکیوں کو نقصان پہنچا لیکن کوئی شخص زخمی نہیں ہوا۔

حکام نے بتایا کہ مشتبہ شخص کو موقع سے گرفتار کر لیا گیا ہے۔ ابتدائی تحقیقات میں انکشاف ہوا ہے کہ فائرنگ کا محرک پادری کے ساتھ ذاتی دشمنی تھی، اور یہ واقعہ مذہبی بنیادوں پر نہیں بلکہ ذاتی رنجش کا نتیجہ تھا۔

یاد رہے کہ سری لنکا میں 2019 میں ایسٹر کے موقع پر ہونے والے بم دھماکوں میں 290 افراد ہلاک اور 500 سے زائد زخمی ہو گئے تھے۔ ان حملوں کے بعد سے ہر سال ایسٹر کی تقریبات کے موقع پر سیکیورٹی انتہائی سخت کر دی جاتی ہے۔

حالیہ واقعے کے بعد حکومت نے ملک بھر کے تمام گرجا گھروں پر سیکیورٹی مزید سخت کرنے کے احکامات جاری کر دیے ہیں، اور مسلح پولیس و فوجی اہلکاروں کو عبادت گاہوں کے باہر تعینات کر دیا گیا ہے تاکہ کسی بھی ناخوشگوار واقعے سے بچا جا سکے۔