بلغاریہ کے ساحل کے قریب مال بردار جہاز ڈرون حملے کے بعد ڈوب گیا، 11 افراد لاپتہ

صوفیہ(ڈیلی اردو) بحیرۂ اسود میں بلغاریہ کے ساحل کے قریب ایک مال بردار جہاز ڈرون حملے کے بعد ڈوب گیا، جس کے نتیجے میں عملے کے 5 افراد کو بچا لیا گیا جبکہ 11 تاحال لاپتہ ہیں۔ بلغاری حکام کے مطابق لاپتہ افراد کی تلاش کے لیے امدادی کارروائیاں جاری ہیں۔

خبر رساں ادارے رائٹرز کے مطابق جہاز بلغاریہ کے ساحلی گاؤں کراپیٹس کے قریب ڈوبا۔ بلغاریہ کی صدر ایلیانا یوٹوا نے جہاز کی شناخت ’’ایچ ایس ڈگنٹی‘‘ کے نام سے کی، جو گنی بساؤ کے پرچم تلے سفر کر رہا تھا۔ حکام نے واقعے کی مزید تفصیلات اور حملے کے ذمہ داروں سے متعلق حتمی معلومات جاری نہیں کیں۔

بلغاری حکام کے مطابق ایک اور مال بردار جہاز ’’چیلسی تھری‘‘ کو بھی گزشتہ رات تین ڈرونز کے ذریعے نشانہ بنایا گیا۔ مالٹا کے پرچم تلے سفر کرنے والے اس جہاز پر 15 افراد سوار تھے، جن میں 7 یوکرینی اور 8 آذربائیجانی شہری شامل تھے۔ حکام کا کہنا ہے کہ تمام افراد کو بحفاظت بچا لیا گیا۔

یہ واقعات ایسے وقت میں پیش آئے ہیں جب روس اور یوکرین کے درمیان جنگ کے باعث بحیرۂ اسود میں تجارتی جہاز رانی کو خطرات لاحق ہیں۔ بلغاریہ کے وزیراعظم رومین رادیف نے تجارتی جہازوں کو نشانہ بنانے کی مذمت کرتے ہوئے کہا کہ بلغاریہ کی سمندری حدود کے قریب ایسے حملے ناقابلِ قبول ہیں۔ انہوں نے براہِ راست روس کو ذمہ دار قرار نہیں دیا، تاہم کہا کہ ان واقعات سے روس کو فائدہ پہنچ رہا ہے۔ روس کی جانب سے فوری طور پر کوئی باضابطہ ردعمل سامنے نہیں آیا۔

یورپی کمیشن کی صدر ارسولا وان ڈیر لیین نے بھی بحیرۂ اسود میں بڑھتے ہوئے خطرات پر تشویش ظاہر کرتے ہوئے حملوں کے ذمہ داروں کو جواب دہ بنانے کا مطالبہ کیا۔ یوکرین کے وزیر خارجہ آندرے سیبیہا نے روس پر الزام عائد کیا کہ وہ بحیرۂ اسود میں جہازوں کو نشانہ بنا کر عالمی غذائی تحفظ کو خطرے میں ڈال رہا ہے۔

رپورٹس کے مطابق گزشتہ ہفتے بھی بلغاریہ کے ساحل کے قریب ایک جہاز ڈرون حملے کے بعد ڈوب گیا تھا، جس کے بعد عملے کے 10 افراد لاپتہ ہوگئے تھے۔ خطے میں تجارتی جہازوں کو درپیش خطرات کے پیش نظر بلغاریہ نے اپنی سمندری اور فضائی حدود کی نگرانی بہتر بنانے کے لیے نیٹو سے تعاون بھی طلب کیا ہے۔