بلوچستان : سیکیورٹی فورسز کی کارروائیاں، 36 دہشتگرد ہلاک، متعدد ٹھکانے تباہ

راولپنڈی(ڈیلی اردو)شورش زدہ صوبہ بلوچستان کے مختلف علاقوں میں سیکیورٹی فورسز نے انٹیلی جنس معلومات کی بنیاد پر متعدد کارروائیاں کرتے ہوئے 36 دہشتگردوں کو ہلاک کردیا۔

پاک فوج کے شعبہ تعلقات عامہ (آئی ایس پی آر) کے مطابق مستونگ میں 4 ستمبر کو کیے گئے ایک آپریشن کے دوران 6 دہشتگرد ہلاک ہوئے۔ کارروائی کے بعد دہشتگردوں کے قبضے سے ملنے والا اسلحہ، گولہ بارود اور دیسی ساختہ دھماکہ خیز آلات موقع پر ہی تلف کردیے گئے۔

آئی ایس پی آر کے مطابق ضلع کوئٹہ کے علاقے شعبان میں بھی سیکیورٹی فورسز نے انٹیلی جنس معلومات کی بنیاد پر کارروائی کی۔ آپریشن کے دوران دہشتگردوں کے 4 ٹھکانے نشانہ بنائے گئے جبکہ 26 دہشتگرد ہلاک ہوئے۔

بیان کے مطابق قلات میں کیے گئے ایک اور انٹیلی جنس بیسڈ آپریشن میں دہشتگردوں کے ٹھکانے کو نشانہ بنایا گیا، جس کے نتیجے میں 2 دہشتگرد ہلاک ہوئے۔

اسی طرح ضلع سبی کے علاقے بھاگ میں سیکیورٹی فورسز کی کارروائی کے دوران مزید 2 دہشتگرد ہلاک کیے گئے۔

آئی ایس پی آر کا کہنا ہے کہ بلوچستان میں گزشتہ 48 سے 72 گھنٹوں کے دوران مختلف کارروائیوں میں مجموعی طور پر 48 دہشتگرد ہلاک کیے جاچکے ہیں۔

پاک فوج کے شعبہ تعلقات عامہ کے مطابق رواں سال بلوچستان میں سیکیورٹی فورسز کی مختلف کارروائیوں کے دوران اب تک 1188 سے زائد دہشتگرد ہلاک کیے جاچکے ہیں۔

آئی ایس پی آر کے مطابق سیکیورٹی فورسز اور قانون نافذ کرنے والے ادارے انسداد دہشتگردی کی کارروائیاں جاری رکھے ہوئے ہیں اور ملک میں دہشتگردی کے خاتمے کے لیے کارروائیاں جاری رکھنے کے عزم کا اظہار کیا ہے۔