بلوچستان: تربت میں سیکیورٹی فورسز کی کارروائی، 6 یمنی باشندے بازیاب، 3 ملزم گرفتار

کوئٹہ (نمائندہ ڈیلی اردو) صوبہ بلوچستان کے ضلع تربت میں سیکیورٹی فورسز کی کارروائی میں چھ یمنی باشندے بازیاب جبکہ تین ملزمان کو گرفتار کرلیا گیا۔

تفصیلات کے مطابق سیکیورٹی فورسز نے جمعہ کو ضلع تربت کے علاقے بہمن سے یمن سے تعلق رکھنے والے چھ افراد کو بازیاب کرا لیا گیا ہے۔ ذرائع کا کہنا ہے کہ آپریشن کے دوران سیکیورٹی فورسز نے تین مشتبہ اغوا کاروں کو بھی گرفتار کرلیا ہے۔ گرفتار ملزمان سے بھاری مقدار میں اسلحہ برآمد کیا گیا۔

ذرائع کا کہنا تھا کہ وہ صرف عربی زبان جانتے ہیں جس سے ان سے تفتیش میں مشکل پیش آ رہی ہے، اور اس کی وجہ سے تاحال یہ معلوم نہیں ہو سکا کہ یہ لوگ کیوں آئے تھے اور ان کو یہاں حبس بے جا میں کیوں اور کب سے رکھا گیا تھا۔

خیال رہے کہ بلوچستان کی ایران سے متصل سرحدی اضلاع کے دشوار گزار علاقوں کو انسانی سمگر اور منشیات کے بین الاقوامی سمگلر استعمال کرتے ہیں۔

اس سے قبل بھی گوادر، تربت اور کیچ سے افریقی اور عرب ممالک سے تعلق رکھنے والے غیر ملکی بازیاب ہوئے تھے۔