بلوچستان: مستونگ جیل سے 2 قیدی فرار، 11 اہلکار گرفتار

مستونگ (ڈیلی اردو) بلوچستان کے ضلع مستونگ میں ڈسٹرکٹ جیل سے 2 قیدی فرار ہوگئے، قیدیوں کی تلاش جاری ہے۔ جیل حکام کے مطابق ڈسٹرکٹ جیل سے فرار ہونے والے دونوں قیدی نصر اللہ اور پیر بخش منشیات کے مقدمے میں جیل میں بند تھے۔ دونوں قیدی ڈیوٹی پر تعینات سپاہیوں کو دھوکا دے کر جیل کی دیوار پھلانگ کر فرار ہوئے۔ جیل حکام کے مطابق فرار ہونے والے قیدیوں کی گرفتاری کے لئے سرچ آپریشن جاری ہے۔

دوسری جانب آئی جی جیل خانہ جات کی درخواست پر مستونگ سٹی پولیس نے سنٹرل جیل مستونگ کے 11 اہلکاروں کو گرفتار کر کے سٹی پولیس تھانہ منتقل کردیا۔ قیدیوں کے فرار اور غفلت برتنے پر جیل اہلکاروں کے خلاف مقدمہ درج کیا گیا ہے۔ جبکہ قیدیوں کی فرار سے متعلق اہلکاروں سے تحقیقات بھی جارہی ہیں۔