بلوچستان میں سکیورٹی فورسز کا آپریشن، 3 دہشت گرد ہلاک، 4 زخمی

کوئٹہ (ڈیلی اردو) پاکستان کے شورش زدہ صوبہ بلوچستان میں سکیورٹی فورسز نے کمبیلہ اور عاصم آباد کے علاقوں میں سرچ اینڈ سینیٹائزیشن آپریشن کرتے ہوئے کالعدم بلوچ لبریشن آرمی (بی ایل اے) کے 3 دہشت گردوں کو ہلاک جبکہ 4 کو زخمی کردیا۔

سکیورٹی ذرائع کے مطابق کمبیلہ اور عاصم آباد میں دہشت گردوں کی موجودگی کی اطلاعات پر سرچ اینڈ سینیٹائزیشن آپریشن کیا گیا، جس کے دوران تقریباً 68 مربع کلومیٹر کا علاقہ کلیئر کرایا گیا۔

ذرائع کا کہنا ہے کہ کارروائی کے دوران کالعدم بلوچ لبریشن آرمی سے وابستہ 3 دہشت گرد ہلاک ہوئے، جن میں سے 2 کی لاشیں سکیورٹی فورسز نے برآمد کرلی ہیں، جبکہ تیسرے ہلاک دہشت گرد کی لاش کی تلاش جاری ہے۔

سکیورٹی ذرائع کے مطابق فائرنگ اور کارروائی کے دوران 4 دہشت گرد زخمی بھی ہوئے۔ زخمیوں میں کالعدم بلوچ لبریشن آرمی کا ایک مبینہ سرغنہ شوکت ماما بھی شامل ہے۔

ذرائع کے مطابق سکیورٹی فورسز نے آپریشن کے دوران 12 مشتبہ افراد کو حراست میں لے کر ان سے تفتیش شروع کردی ہے، جبکہ علاقے میں مشتبہ افراد اور دہشت گردوں کے ممکنہ سہولت کاروں کی تلاش بھی جاری ہے۔

سکیورٹی فورسز نے کارروائی کے دوران دہشت گردوں کی متعدد مبینہ پناہ گاہیں بھی ختم کردیں۔ ذرائع کے مطابق ان مقامات سے کالعدم بلوچ لبریشن آرمی کے جھنڈے بھی ہٹا دیے گئے ہیں۔

سکیورٹی ذرائع کا کہنا ہے کہ علاقے کو دہشت گردوں سے پاک کرنے اور ان کے نیٹ ورک کا سراغ لگانے کے لیے کلیئرنس اور سرچ آپریشن مزید جاری رہنے کا امکان ہے۔

حکام کے مطابق کارروائی کا مقصد علاقے میں دہشت گرد عناصر کی موجودگی ختم کرنا، ان کے ٹھکانوں کو تباہ کرنا اور مقامی آبادی کے تحفظ کو یقینی بنانا ہے۔