بلوچستان: نوشکی میں سیکورٹی آپریشن کے دوران 2 مبینہ دہشت گرد ہلاک

راولپنڈی (ڈیلی اردو) بلوچستان کے ضلع نوشکی کے قریب سکیورٹی فورسز نے کارروائی کرتے ہوئے دو مبینہ دہشت گردوں کو ہلاک کر دیا۔

پاکستانی فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے نوشکی کے قریب دہشت گردوں کی موجودگی کی اطلاع پر آپریشن کیا۔

آئی ایس پی آر کے مطابق دہشت گردوں نے فورسز کو دیکھتے ہی فائرنگ شروع کر دی اور فرار ہونے کی کوشش کی تاہم فورسز اور دہشت گردوں کے درمیان فائرنگ کے تبادلے میں دو دہشت گرد ندیم اور شہزاد ہلاک ہوگئے۔

دہشت گرد خاران میں سکیورٹی فورسز پر حملوں اور آئی ای ڈی دھماکے میں ملوث تھے۔ آپریشن کے دوران ہتھیار اور گولیاں بھی برآمد کرلی گئیں۔

ترجمان پاکستانی فوج کا کہنا ہے کہ بلوچستان میں امن و استحکام کو تباہ کرنے کی ہر کوشش ناکام بنا دیں گے۔

خیال رہے کہ رواں سال فروری میں دہشت گردوں نے رات کے اوقات میں نوشکی اور پنجگور میں سکیورٹی فورسز کے کیمپوں پر حملے کیے تھے۔ سیکورٹی فورسز نے دونوں جگہ کلیئرنس آپریشنز کر کے کم از کم 20 دہشت گردوں کو ہلاک کیا تھا۔