بلوچستان: نوشکی میں فائرنگ سے پولیو ٹیم کی حفاظت پر مامور پولیس اہلکار ہلاک

کوئٹہ (ڈیلی اردو/بی بی سی) پاکستان کے صوبے بلوچستان کے ضلع نوشکی میں نامعلوم افراد کی فائرنگ سے انسدادِ پولیو ٹیم کی حفاظت پر مامور ایک پولیس اہلکار ہلاک ہو گیا ہے۔

بلوچستان حکومت کے ترجمان شاہد رند نے تصدیق کی ہے کہ نوشکی میں انسداد پولیو ٹیم کی سکیورٹی پر مامور ٹیم پر فائرنگ ہوئی ہے اور اس کے نتیجے میں وحید احمد نامی پولیس اہلکار ہلاک ہوا ہے۔

بلوچستان حکومت کے ترجمان کا ایک بیان میں کہنا تھا کہ ہلاک ہونے والے پولیس اہلکار کا تعلق ضلع نوشکی کے علاقے جمال آباد سے تھا۔

ترجمان کے مطابق ’یہ حملہ قومی مہم کو ثبوتاژ کرنے اور خوف و ہراس پھیلانے کی سازش ہے۔‘

شاہد رند کے مطابق صوبائی حکومت انسداد پولیو ٹیموں اور سکیورٹی اہلکاروں کی حفاظت کو مزید مؤثر بنائے گی۔

خیال رہے گذشتہ روز پاکستان میں انسدادِ پولیو پروگرام کے تحت ملک میں سال کی تیسری قومی انسدادِ پولیو مہم کا باقاعدہ آغاز کیا گیا تھا۔

چھبیس مئی سے شروع ہونے والی ہفتہ وار قومی انسدادِ پولیو مہم کے دوران پانچ سال سے کم عمر کے 4 کروڑ 50 لاکھ سے زائد بچوں کو پولیو سے بچاؤ کی ویکسین فراہم کی جائے گی۔

رواں سال پاکستان سے پولیو کے 10 کیسز رپورٹ ہو چکے ہیں۔ اس کے علاوہ ملک بھر کے چاروں صوبوں اور پاکستان کے زیرِ انتظام کشمیر کے 127 مقامات سے حاصل کردہ 272 ماحولیاتی نمونوں میں پولیو وائرس پایا گیا ہے، جس سے اس سال پولیو سے متاثرہ اضلاع کی مجموعی تعداد 68 ہو گئی ہے۔

دوسری جانب پاکستان کے وزیرِ داخلہ محسن نقوی نے انسدادِ پولیو ٹیم کی سکیورٹی پر مامور ٹیم پر حملہ ناقابلِ برداشت قرار دیتے ہوئے کہا ہے کہ بچوں کے محفوظ و صحت مند مستقبل پر حملہ کرنے والوں سے آہنی ہاتھوں سے نمٹا جائے گا۔