بلوچستان: واشک میں سکیورٹی فورسز کا آپریشن، 5 دہشتگرد ہلاک، 4 زخمی، بھاری اسلحہ برآمد

واشک (ڈیلی اردو) بلوچستان کے شورش زدہ ضلع واشک کے علاقے پلانتک میں سکیورٹی فورسز نے خفیہ اطلاع کی بنیاد پر کارروائی کرتے ہوئے 5 دہشتگردوں کو ہلاک اور 4 کو زخمی کردیا۔ کارروائی آپریشن ردالفتنہ 3 کے تحت کی گئی، جس میں ہلاک دہشتگردوں کے قبضے سے جدید اسلحہ اور دیگر سامان بھی برآمد ہوا۔

سکیورٹی ذرائع کے مطابق کارروائی کے دوران ایک آر پی جی 7 لانچر، اس کے 5 گولے، میگزینز، 5 جدید ہتھیار، 3 موبائل فون اور 2 موٹر سائیکلیں تحویل میں لی گئیں۔

ذرائع کا دعویٰ ہے کہ ہلاک دہشتگرد بلوچستان میں شہریوں کو لوٹنے، خوف و ہراس پھیلانے اور بنیادی ڈھانچے کو نقصان پہنچانے کی سرگرمیوں میں ملوث تھے۔ سکیورٹی فورسز کی جانب سے علاقے میں دہشتگردی کے خلاف کارروائیاں جاری رکھنے کے عزم کا اظہار کیا گیا ہے۔