بلوچستان: ژوب میں سی ٹی ڈی کی کارروائی، کالعدم تنظیم کے 3 دہشت گرد ہلاک، 2 اہلکار زخمی

کوئٹہ (ڈیلی اردو) صوبہ بلوچستان کے ضلع ژوب میں کاؤنٹر ٹیررازم ڈیپارٹمنٹ (سی ٹی ڈی) نے کارروائی کرتے ہوئے 3 دہشت گردوں کو ہلاک کردیا، فائرنگ کے تبادلے میں دو اہلکار بھی زخمی ہوئے۔

بلوچستان کے ضلع ژوب کے علاقے مرغہ کبزئی میں سی ٹی ڈی کے آپریشن میں کالعدم تحریک طالبان پاکستان 3 دہشت گرد مارے گئے۔ جبکہ دہشت گردوں کی فائرنگ سے دو اہلکار بھی زخمی ہوگئے۔ ہلاک دہشت گردوں کے قبضے سے اسلحہ اور دیگر سامان بھی برآمد ہوا ہے۔ #Zhob #Balochistan #Pakistan

— Shabbir Hussain Turi (@ShabbirTuri) August 9, 2023

ترجمان سی ٹی ڈی کے مطابق ضلع ژوب کے علاقے مرغہ کبزئی میں دہشت گردوں کی موجودگی کی اطلاع پر آپریشن کیا گیا، اس دوران سیکیورٹی فورسز اور حملہ آوروں کے درمیان فائرنگ کا تبادلہ ہوا، جوابی فائرنگ میں 3 دہشت گرد مارے گئے۔

ترجمان کے مطابق کارروائی امیرجماعت اسلامی کے قافلے پر حملہ کے ملزمان کی موجودگی پر کی گئی تھی ۔

ترجمان کا کہنا ہے کہ دہشت گردوں کی فائرنگ سے دو سی ٹی ڈی اہلکار بھی زخمی ہوئے، جنہیں طبی امداد فراہم کرنے کیلئے قریبی ہسپتال منتقل کردیا گیا ہے۔

ترجمان کے مطابق ہلاک دہشت گردوں کا تعلق کالعدم تنظیم سے ہے، جن سے اسلحہ اور دیگر سامان بھی برآمد ہوا ہے۔

پولیس نے علاقے میں مزید ملزمان کی تلاش کیلئے سرچ آپریشن شروع کردیا۔