بلوچستان: ہوشاب میں بارودی مواد کی تنصیب کے دوران دھماکا، 3 حملہ آور ہلاک، سی ٹی ڈی کا دعویٰ

کوئٹہ (ڈیلی اردو) صوبہ بلوچستان کے ضلع کیچ کے علاقے ہوشاب میں دھماکے کے نتیجے میں 3 مبینہ دہشت گرد ہلاک ہوگئے۔

کاؤنٹر ٹیررازم ڈیپارٹمنٹ (سی ٹی ڈی) ترجمان کے مطابق ہوشاب کے علاقے بالگتر میں ہونے والے دھماکے کی تحقیقات میں اہم پیش رفت ہوئی ہے۔

ترجمان نے دعویٰ کیا ہے کہ حملہ آور بارودی مواد کی ترسیل و تنصیب کے دوران دھماکے کا شکار ہوئے۔

ترجمان کا کہنا تھاکہ حملہ آوروں کا تعلق کالعدم تنظیم سے بتایا جاتا ہے اور ہلاک افراد کی شناخت نبی داد، شاہ جہاں اور عادل کے نام سے ہوئی ہے۔

یاد رہے کہ گزشتہ روز ڈپٹی کمشنر ضلع کیچ حسین جان بلوچ نے نجی ٹی وی چینل ڈان نیوز کو بتایا تھا کہ ہوشاب کے علاقے بالگتر میں گاڑی کے قریب دھماکا ہوا ہے جس سے کار میں سوار تین افراد ہلاک ہوگئے۔

اطلاع ملتے ہی لیویز اہلکار پہنچ گئے اور لاشوں کو تربت ہسپتال منتقل کردیا۔

انہوں نے مزید کہا کہ اب تک یہ معلوم نہیں ہوسکا کہ دھماکا گاڑی کے بارودی سرنگ سے ٹکرانے کے نتیجے میں ہوا یا سڑک کنارے نصب کیے گئے بم کے نتیجے میں یہ دھماکا ہوا، ہم اس حوالے سے تحقیقات کر رہے ہیں۔