بنوں میں تحریک طالبان پاکستان کے اہم کمانڈر سمیت چار دہشت گرد ہلاک

بنوں (نمائندہ ڈیلی اردو) کاؤنٹر ٹیررازم ڈیپارٹمنٹ اور سیکورٹی فورسز کی کارروائی میں کالعدم تنظیم کے اہم کمانڈر سمیت چار مبینہ دہشت گرد مارے گئے۔

کاؤنٹر ٹیررازم ڈیپارٹمنٹ (سی ٹی ڈی) کے مطابق خیبر پختونخوا کے ضلع بنوں میں دہشت گردوں کی اطلاع کی موجودگی پر سی ٹی ڈی، پولیس اور سیکیورٹی فورسز کے ہمراہ مشترکہ طور پر آپریشن کیا گیا جس میں دہشتگردوں نے فورسز پر فائرنگ کردی۔

سی ٹی ڈی کا بتانا ہے کہ سیکورٹی فورسز کے اہلکاروں اور دہشتگردوں کے درمیان فائرنگ کا شدیس تبادلہ ہوا جس سے فورسز کی جوابی فائرنگ میں کالعدم تنظیم تحریک طالبان پاکستان کے اہم کمانڈر نور محمد سمیت چار مبینہ دہشت گرد مارے گئے۔

حکام کے مطابق آپریشن کے دوران کلاشنکوف، 3 عدد میگزین، رائفل، 2 عد پستول اور میگزین اور بڑی تعداد میں کارتوس، شناختی کارڈ، نقدی، مختلف قسم کارڈز، موبائل فونز اور دیگر سامان برآمد ہوا ہے۔

سی ٹی ڈی کا دعویٰ ہے کہ نور محمد نامی اس ملزم کے سر کی قیمت 15 لاکھ روپے مقرر تھی۔

سی ٹی ڈی کے مطابق ہلاک دہشتگرد ٹارگٹ کلنگ، بم دھماکوں اور فورسز پر حملوں میں مطلوب تھے۔