بنگلادیشی وزیراعظم پر حملہ کرنے والے 9 افراد کو سزائے موت

ڈھاکا (ڈیلی اردو) بنگلادیش کی وزیراعظم حسینہ واجد پر سن1994 میں حملہ کرنے والے نوحملہ آوروں کو بنگلادیش کی عدالت نے سزائے موت جبکہ پچیس کو عمرقید کی سزا سنادی۔

خبررساں ایجنسی کے مطابق بنگلادیش کی عدالت نے چوبیس سال پرانے کیس کا فیصلہ سنا دیا۔ بنگلادیشی عدالت نے وزیراعظم حسینہ واجد پر انیس سو چورانوے میں ٹرین حملے کے الزام میں نو حملہ آوروں کو سزائے موت جبکہ پچیس کو عمرقید کی سزا سنادی ہے۔

دوسری جانب سابقہ وزیراعظم اور اس وقت کی اپوزیشن کی رہنما خالدہ ضیا نے عدالتی فیصلے کو رد کرتے ہوئے اسے سیاسی فیصلہ قرار دیا۔

رپورٹ کے مطابق بنگلادیشی وزیراعظم حسینہ واجد پر اب تک تقریباً 19 حملے ہوچکے ہیں تاہم تمام حملوں میں وہ جان بچانے میں کامیاب رہیں۔

واضح رہے کہ تیئس ستمبر انیس سو چورانوے کو اس وقت کی اپوزیشن لیڈر شیخ حسینہ واجد ٹرین میں سفر کررہی تھی کہ ان پر پکشی ریلوے اسٹیشن پر قاتلانہ حملہ ہوا جس میں حملہ آوروں نے نہ صرف براہ راست فائرنگ کی تھی اور ٹرین پر دستی بم بھی پھینکے جس کے نتیجے میں درجنوں افراد جاں بحق ہوگئے تھے تاہم شیخ حسینہ واجد حملے میں بچ گئی تھیں۔