بولیویا میں فوجی اڈے کے اندر زور دار دھماکا، 10 افراد ہلاک، 62 زخمی

لاپاز(ڈیلی اردو) بولیویا کے شہر لاپاز کے قریب واقع فوجی بیرک میں ہونے والے شدید دھماکے کے نتیجے میں کم از کم 10 افراد ہلاک جبکہ 62 زخمی ہوگئے۔

مقامی حکام کے مطابق دھماکا جمعہ کے روز ویاتچا میونسپلٹی میں واقع ایک فوجی مرکز کے اندر تقریباً دوپہر ڈھائی بجے ہوا، جہاں آتش گیر مواد ذخیرہ کیا جاتا تھا۔ دھماکے کی شدت کے باعث علاقے میں شدید نقصان پہنچا اور متعدد افراد متاثر ہوئے۔

ویاتچا کی محکمہ صحت کی سربراہ ریتا نیبراسکا کے مطابق ہلاکتوں کی تعداد 10 سے 15 تک ہونے کا خدشہ ہے، جبکہ زخمیوں میں سے 14 افراد کو مزید علاج کے لیے لاپاز کے اسپتالوں میں منتقل کیا گیا ہے۔

حکام کے مطابق زخمیوں میں ایک لڑکی بھی شامل ہے جو شدید نوعیت کے جھلسنے کا شکار ہوئی ہے۔ دھماکے کی وجوہات جاننے کے لیے تحقیقات جاری ہیں۔