ترک جنگی طیاروں کی عراق میں ایک گاڑی پر بمباری، 4 جنگجو ہلاک

استنبول (ڈیلی اردو) ترکی کے جنگی طیاروں نے عراق کے صوبہ کردستان کے شمال میں دھوک گورنری میں ایک گاڑی پر بمباری کی ہے جس کے نتیجے میں اس گاڑی میں سوار کم سے کم چار افراد ہلاک ہوگئے۔

عرب ٹی وی کے مطابق ترک طیاروں نے عراق کے کردستان صوبے میں ایک گاڑی کو نشانہ بنایا۔ ایک عہدیدار نے بتایاکہ ترکی کے فضائی حملوں میں دھوک شہر سے تقریبا 20 کلومیٹر دور ایک کار کو نشانہ بنایا گیا تھا جس میں 4 پی کے کے جنگجو ہلاک ہوگئے تھے۔

نواحی علاقے زاویتہ کے ڈائریکٹر مشیر گولی نے بتایا کہ ترک جنگی طیاروں نے دہوک سے 20 کلومیٹر دور راشانکی گاں اور زاویتہ کے مرکز کے درمیان مرکزی سڑک پر ایک کار پر بمباری کی۔

انہوں نے مزید کہا کہ اس بمباری کے نتیجے میں تمام چار کرد جنگجو ہلاک ہوگئے تھے۔حملے میں کار مکمل طور پر تباہ ہو گئی۔

اس واقعے سے دو روز قبل ترکی کے ایک ڈرون طیارے نے اربیل کے شمال میں سیدکان میں عراقی فوجی گاڑی کو نشانہ بنایا جس کے نتیجے میں عراقی بارڈر فورس کے دو اعلی اہلکار ہلاک ہوگئے تھے۔ اس واقعے کے بعد عراق اور ترکی کے درمیان کشیدگی پیدا ہوئی جس پر عراق نے ترکی سے سخت احتجاج کیا تھا۔