ترکیہ: استنبول میں سیکیورٹی اداروں کی کاروائی ،داعش سے مبینہ تعلق رکھنے والا شخص ہلاک

استنبول(ڈیلی اردو) ترکیہ کے شہر استنبول میں سیکیورٹی اداروں نے کارروائی کرتے ہوئے داعش سے مبینہ طور پر وابستہ 21 سالہ شخص کو ہلاک کردیا، جبکہ حکام کے مطابق کارروائی کے دوران ایک ممکنہ دہشتگرد حملے کا منصوبہ بھی ناکام بنا دیا گیا۔

ترکیہ کے سرکاری نشریاتی ادارے کے مطابق کارروائی استنبول کے علاقے سلطان بیلی میں ترک انٹیلی جنس ادارے اور پولیس نے مشترکہ طور پر کی۔ سیکیورٹی اداروں کو شبہ تھا کہ نوجوان داعش سے رابطے میں ہے اور ترکیہ میں دہشتگرد حملے کی منصوبہ بندی کررہا ہے۔

رپورٹ کے مطابق سیکیورٹی اہلکار جب مشتبہ شخص کو گرفتار کرنے کے لیے پہنچے تو اس نے پولیس پر فائرنگ کردی۔ اہلکاروں کی جوابی کارروائی میں وہ ہلاک ہوگیا۔

فائرنگ کے تبادلے کے دوران ایک شہری بھی زخمی ہوا، جسے طبی امداد کے لیے منتقل کیا گیا۔

استنبول کے گورنر داؤد گل نے سماجی رابطے کی ویب سائٹ ایکس پر جاری بیان میں انٹیلی جنس اور پولیس اہلکاروں کی کارروائی کو سراہتے ہوئے ممکنہ خطرے کی بروقت نشاندہی اور تدارک پر ان کا شکریہ ادا کیا۔

ترک حکام کے مطابق واقعے کی مزید تحقیقات جاری ہیں اور ہلاک ہونے والے شخص کے داعش سے ممکنہ روابط اور حملے کی منصوبہ بندی سے متعلق مزید معلومات جمع کی جارہی ہیں۔