جاپان اور امریکہ کی پیٹریاٹ میزائل ڈیفنس سسٹم کی امریکا منتقلی پر مشاورت

واشنگٹن (ڈیلی اردو) جاپان اور امریکا نئے سال ( 2024) کے آغاز میں جاپانی مسلح افواج سے پیٹریاٹ میزائل ڈیفنس سسٹم کے میزائلوں کی امریکا منتقلی پر مشاورت شروع کریں گے۔

غیرملکی خبر رساں ادارے کے مطابق سب سے پہلے پی اے سی۔2 میزائلوں کی فراہمی کو مربوط کرنے کا منصوبہ ہے جو بنیادی طور پر ہوائی جہاز اور کروز میزائلوں کو روکنے کے لیے ڈیزائن کیے گئے ہیں۔ مستقبل میں جاپان امریکا کو پی اے سی3 میزائل بھی فراہم کرے گا جو بیلسٹک میزائلوں کے مقابلے میں استعمال ہوتے ہیں۔

22 دسمبر کو جاپانی حکومت نے دفاعی سازوسامان کی برآمد کے لئے اصولوں میں نرمی کی تھی جس کے تحت وہ امریکا کو پیٹریاٹ میزائل دفاعی نظام کے لیے میزائل اور برطانیہ کو 155 ملی میٹر توپ کے گولے فراہم کر سکتا ہے۔اس سے قبل جاپان صرف امریکا کو دفاعی سازوسامان کے آلات فراہم کر سکتا تھا، یہ چھوٹ ان ممالک کو تیار آلات کی فراہمی کی اجازت دے گی جنہوں نے پروڈکشن لائسنس جاری کئے ہیں۔

واضح رہے کہ امریکا کی جانب سے یوکرین کو مسلسل اسلحے کی فراہمی کے باعث اس کا اپنا سٹاک کم ہوگیا ۔