جرمنی: نیٹو بیس پر ممکنہ خطرے کے پیش نظر سکیورٹی میں اضافہ

برلن (ڈیلی اردو/اے ایف پی/ڈی پی اے/رائٹرز) جرمنی کے گائلین کریشن میں واقع نیٹو ایئر بیس کا کہنا ہے کہ اس نے ممکنہ خطرے کی نشاندہی کرنے والی انٹیلیجنس رپورٹس کے سبب غیر ضروری عملے کو گھر بھیج دیا ہے۔ حکام کے مطابق فضائی اڈے پر سکیورٹی میں بھی اضافہ کر دیا گیا ہے۔

مغربی جرمنی میں نیٹو کی ایک ایئر بیس نے جمعرات کے روز کہا کہ انٹیلیجنس رپورٹس کی جانب سے ممکنہ خطرات کی اطلاعات کے بعد اس نے فضائی اڈے کی سکیورٹی کو دوسری اعلیٰ ترین سطح پر پہنچا دیا ہے۔

نیٹو کی فضائی بیس نے سوشل میڈیا پلیٹ فارم ایکس پر اپنی ایک پوسٹ میں کہا، “ہم نے ممکنہ خطرے کی نشاندہی کرنے والی انٹیلیجنس معلومات کی بنیاد پر نیٹو ایئر بیس گائلین کریشن پر سکیورٹی کی سطح کو بڑھا دیا ہے۔”

کوئی تفصیل بتائے بغیر اپنی ایک اور پوسٹ میں حکام نے کہا کہ “احتیاطی تدابیر کے طور پر مشن کے تمام غیر ضروری عملے کو گھر بھیج دیا گیا ہے۔ اپنے عملے کی حفاظت ہماری اولین ترجیح ہے۔ تاہم آپریشنز منصوبہ بندی کے مطابق جاری رہیں گے۔”

گائلین کرشن ایئربیس کے ترجمان نے کہا کہ سکیورٹی چارلی کی سطح تک بڑھا دی گئی ہے۔ نیٹو کی تعریف کے مطابق چارلی کی سطح کا مطلب یہ ہوا کہ کوئی واقعہ پیش آ چکا ہے یا پھر ایسے شواہد موجود ہیں جو اتحاد کے خلاف دہشت گردی کی کارروائی کے زیادہ امکانات کی نشاندہی کرتے ہیں۔

البتہ حکام نے اس سلسلے میں کوئی تفصیلات فراہم نہیں کی ہیں، تاہم یقین دہانی کرائی ہے کہ تشویش کی کوئی وجہ نہیں ہے اور احتیاطی تدابیر کے طور پر سکیورٹی بڑھا دی گئی ہے۔

بار بار کی دھمکیاں

یہ دوسرا موقع ہے کہ نیٹو کے نگرانی والے طیاروں کے بیڑے کے اڈے پر سکیورٹی بڑھانی پڑی ہے۔

گزشتہ ہفتے کولون میں پانی کے اندر مشتبہ تخریب کاری کی تحقیقات کے لیے ایک فوجی اڈے کو اس وقت سیل کر دیا گیا تھا، جب پینے کا پانی کے ذخیرہ کرنے کی سہولیات کے قریب ایک باڑ میں ایک سوراخ پایا گیا تھا۔

اس سے قبل نیٹو نے روس کی طرف سے ایسی دھمکیوں کے بارے میں خبردار کیا تھا، جس میں تخریب کاری اور سائبر حملوں کی کارروائیاں شامل ہو سکتی ہیں۔

نیٹو کے سیکرٹری جنرل جینز اسٹولٹن برگ نے جون میں کہا تھا کہ مغربی فوجی اتحاد ایک پیٹرن کو تبدیل ہوتے ہوئے دیکھ رہا ہے اور حالیہ حملے روسی انٹیلیجنس کے زیادہ فعال ہونے کا نتیجہ ہیں۔