جنوبی ایسٹونیا: نیٹو ممالک کی ایئر فورسز نے یوکرینی ڈرون مار گرایا

برلسز (ڈیلی اردو/ڈوئچے ویلے) شمالی یورپ میں بالٹک کی جمہوریاؤں کے علاقے میں ’فضائی پولیس فورس‘ کا کام کرنے والے اور مغربی دفاعی اتحاد نیٹو کے رومانیہ کی ایئر فورس سے تعلق رکھنے والے ایک ایف سولہ جنگی طیارے نے جمہوریہ ایسٹونیا کی فضا میں منگل 19 مئی کے روز ایک ایسا مسلح ڈرون مار گرایا، جس کے بارے میں خیال کیا جاتا ہے کہ اسے روس پر حملے کے لیے یوکرین کی طرف سے بھیجا گیا تھا۔

نیٹو کے حکام نے بتایا کہ اس ڈرون کی بلندی اور پرواز کا رخ دیکھتے ہوئے یہ فیصلہ کیا گیا تھاکہ اسے مار گرایا جائے۔ اس امر کی ایسٹونیا کے وزیر دفاع ہانو پیوکور نے بھی تصدیق کر دی ہے۔

ہانو پیوکور نے نیوز ایجنسی ایسوسی ایٹڈ پریس کو بتایا، ’’ہماری رائے میں غالب امکان یہ ہے کہ یہ روسی یوکرینی جنگ میں روس میں کسی ہدف پر حملے کے لیے بھیجا گیا ایک یوکرینی جنگی ڈرون تھا۔‘‘

یہ تازہ واقعہ ایسے واقعات کی سلسلے کی نئی کڑی ہے، جن میں حالیہ مہینوں کے دوران یوکرین کی طرف سے روس پر حملوں کے لیے بھیجے گئے جنگی ڈرونز کئی مرتبہ نیٹو کے رکن کسی ملک کی فضا میں یا تو داخل ہو گئے تھے یا مار گرائے گئے تھے۔

منگل کے روز یہ واقعہ ایسے وقت پر پیش آیا، جب یوکرین روسکے خلاف اپنی جنگ میں روسی عسکری اہداف، خاص طور پر روسی علاقے میں توانائی کی تنصیبات پر اپنے ڈرون حملوں میں کافی تیزی لا چکا ہے۔

گزشتہ اتوار 17 مئی کو روسی حکام نے کہا تھا کہ روس میں بڑی تعداد میں یوکرینی ڈرونز کے ساتھ کیے جانے والے ایک بڑے حملے میں مجموعی طور پر کم ا زکم چار افراد مارے گئے تھے۔

ان میں سے تین افراد روسی دارالحکومت ماسکو کے نواح میں ہلاک ہوئے تھے جبکہ ان یوکرینی ڈرون حملوں میں ایک درجن سے زائد افراد زخمی بھی ہو گئے تھے۔