جنوبی وزیرستان : بے نظیر انکم سپورٹ پروگرام دفتر پر فائرنگ، نوجوان ہلاک، خاتون زخمی

وانا(ڈیلی اردو) خیبرپختونخواہ کے شورش زدہ ضلع جنوبی وزیرستان لوئر کے علاقے اعظم ورسک میں بے نظیر انکم سپورٹ پروگرام کے دفتر میں فائرنگ کے واقعے کے دوران ایک نوجوان ہلاک جبکہ خاتون زخمی ہوگئی۔

ذرائع کے مطابق نامعلوم مسلح افراد نے دفتر میں فائرنگ کی، جس کے نتیجے میں اعظم ورسک کا رہائشی خالق نور وزیر ولد کالا خان زخمی ہوگیا۔ اسے فوری طور پر وانا اسپتال منتقل کیا گیا، جہاں ابتدائی طبی امداد کے بعد تشویشناک حالت کے باعث ڈیرہ اسماعیل خان منتقل کیا جا رہا تھا کہ راستے میں زخموں کی تاب نہ لاتے ہوئے ہلاک ہوگیا۔

فائرنگ کے نتیجے میں ایک خاتون بھی زخمی ہوئی، جسے طبی امداد کے لیے اسپتال منتقل کردیا گیا۔

واقعے کے بعد مسلح حملہ آور موقع سے فرار ہوگئے۔ پولیس اور متعلقہ اداروں نے واقعے کی تحقیقات شروع کردی ہیں جبکہ فائرنگ کے محرکات اور ملزمان کی شناخت کے حوالے سے مزید تفتیش جاری ہے۔