جنوبی وزیرستان میں خیمے پر مارٹر گولہ گرنے سے 2 خواتین اور ایک بچی ہلاک، 5 افراد زخمی

جنوبی وزیرستان (نمائندہ ڈیلی اردو) پاکستان کے شورش زدہ صوبہ  خیبر پختونخوا کے ضلع جنوبی وزیرستان اپر کی تحصیل سراروغہ کے علاقے احمد وام میں کوچی (پیوندہ) خاندان کے ایک خیمے پر مارٹر گولہ گرنے کے نتیجے میں دو خواتین اور ایک بچی ہلاک جبکہ پانچ افراد زخمی ہو گئے۔

مقامی ذرائع کے مطابق متاثرہ خاندان پتھریلی علاقے میں عارضی خیموں میں مقیم تھا کہ اچانک ایک مارٹر گولہ ان کے خیمے پر آ گرا۔ دھماکے کے باعث خیمہ مکمل طور پر تباہ ہو گیا اور اس میں موجود افراد ملبے اور دھماکے کی زد میں آ گئے۔

واقعے کے فوراً بعد مقامی افراد نے اپنی مدد آپ کے تحت امدادی کارروائیاں شروع کیں اور زخمیوں کو نکال کر قریبی ہسپتال منتقل کیا، جہاں انہیں طبی امداد فراہم کی جا رہی ہے۔ زخمیوں میں خواتین، بچے اور مرد شامل ہیں، جبکہ بعض زخمیوں کی حالت تشویشناک بتائی جا رہی ہے۔

ذرائع کے مطابق ہلاک ہونے والوں کی لاشیں بھی ہسپتال منتقل کر دی گئی ہیں، جہاں ضروری قانونی کارروائی کے بعد انہیں ورثا کے حوالے کیا جائے گا۔

واقعے کے بعد علاقے میں خوف و ہراس پھیل گیا، جبکہ سکیورٹی اور انتظامی حکام نے موقع پر پہنچ کر صورتحال کا جائزہ لیا۔ حکام کا کہنا ہے کہ مارٹر گولہ گرنے کی وجوہات کا تعین کرنے کے لیے تحقیقات شروع کر دی گئی ہیں، تاہم فوری طور پر یہ واضح نہیں ہو سکا کہ گولہ کہاں سے فائر کیا گیا تھا۔

یاد رہے کہ جنوبی وزیرستان کے بعض سرحدی اور پہاڑی علاقوں میں وقفے وقفے سے فائرنگ اور گولہ باری کے واقعات پیش آتے رہتے ہیں، جن میں شہری آبادی بھی متاثر ہوتی ہے۔