حسن نصراللہ کی پہلی برسی، لبنان بھر میں اجتماعات

بیروت (ڈیلی اردو ) لبنان کی عسکری تنظیم حزب اللہ آج 27 ستمبر بروز ہفتہ اپنے سابق سربراہ حسن نصراللہ کی پہلی برسی منا رہی ہے، جنہیں 27 ستمبر 2024 کو اسرائیلی فضائی حملے میں ہلاک کر دیا گیا تھا۔ اس حملے نے ایک بڑی جنگ کو جنم دیا، جس میں حزب اللہ کو شدید نقصان پہنچا اور لبنان کے کئی حصے تباہ ہو گئے۔

حسن نصراللہ تین دہائیوں سے زائد عرصے تک اس ایران نواز تنظیم کے روح رواں رہے۔ ان کے بعد ان کے جانشین ہاشم صفی الدین بھی چند ہفتوں بعد ہلاک ہو گئے جبکہ دسمبر تک شام میں حزب اللہ کے حلیف بشار الاسد کی حکومت بھی گر گئی۔ اس کے باوجود حزب اللہ نے ہتھیار ڈالنے کے مطالبات کو مسترد کر دیا ہے۔

حسن نصراللہ 1992 میں محض 35 برس کی عمر میں حزب اللہ کے سیکرٹری جنرل بنے۔ وہ 2000 میں اسرائیلی فوج کے انخلا اور 2006 کی 34 روزہ جنگ کے بعد عرب دنیا میں شہرت حاصل کر گئے تھے۔ وقت کے ساتھ ساتھ حزب اللہ لبنان کی سب سے طاقتور سیاسی اور عسکری قوت اور ایران کے "محورِ مزاحمت" کا مرکزی حصہ بن گئی۔

سات اکتوبر 2023 کو اسرائیل میں حماس کے حملے کے بعد حزب اللہ نے بھی اسرائیل پر گولہ باری شروع کر دی، جس کے نتیجے میں تقریباً ایک سال تک مسلح جھڑپیں جاری رہیں۔ اسرائیل کی فضائی اور زمینی کارروائی میں چار ہزار سے زائد افراد ہلاک ہوئے، جن میں 300 سے زیادہ بچے شامل تھے۔

حسن نصراللہ کی تدفین طویل عرصے تک ممکن نہیں ہو سکی تھی، تاہم اب ان کی قبر پر بڑی تعداد میں پیروکار دعا کے لیے آتے ہیں۔ ہفتے کو بیروت کے جنوبی مضافات، جنوبی لبنان اور مشرقی علاقوں میں اجتماعات منعقد ہو رہے ہیں، جہاں حزب اللہ کے موجودہ سیکرٹری جنرل نعیم قاسم خطاب کریں گے۔

اس برسی سے قبل لبنان میں سیاسی تناؤ میں اضافہ ہو گیا ہے، خاص طور پر اس وقت جب حزب اللہ نے بیروت کے ساحل پر واقع مشہور چٹانوں پر نصراللہ اور صفی الدین کی تصاویر آویزاں کیں، حالانکہ لبنانی وزیر اعظم نواز سلام اور بیروت کے گورنر نے اس کی اجازت نہیں دی تھی۔ حزب اللہ کے مخالفین نے اس اقدام کو شدید تنقید کا نشانہ بنایا ہے۔