حوثی حملوں کے بعد سعودی عرب کا بڑا قدم، بحیرۂ احمر کے تحفظ کے لیے کثیرالملکی بحری اتحاد

ریاض (ڈیلی اردو رپورٹ) سعودی عرب نے بحیرۂ احمر میں بین الاقوامی جہاز رانی اور توانائی کی ترسیل کے راستوں کے تحفظ کے لیے ایک کثیرالملکی بحری دفاعی اتحاد کے قیام کا منصوبہ پیش کیا ہے۔

سعودی وزارتِ دفاع کے مطابق اس مجوزہ اتحاد کا مقصد بحری سلامتی کو مضبوط بنانا، جہاز رانی کی آزادی کا تحفظ، بین الاقوامی تجارتی راستوں اور توانائی کی راہداریوں کو محفوظ بنانا اور باب المندب اور خلیجِ عدن میں مشترکہ بحری مفادات کا دفاع کرنا ہے۔

وزارتِ دفاع نے بتایا کہ 43 ممالک اور یورپی یونین کے نمائندوں نے ایک بین الاقوامی اجلاس میں شرکت کی، جہاں اس منصوبے پر تبادلۂ خیال کیا گیا۔ منصوبے کے تحت سعودی عرب اس اتحاد کا بانی اور سربراہ ملک ہوگا، جبکہ اس کا مرکزی دفتر بھی سعودی عرب میں قائم کیا جائے گا۔

یہ پیش رفت یمن میں ایران کے حمایت یافتہ حوثی گروپ کی جانب سے بحیرۂ احمر میں بحری جہازوں پر حملوں کے بعد سامنے آئی ہے، جن سے عالمی تجارت کی اہم بحری گزرگاہ متاثر ہوئی ہے۔

سعودی وزارتِ دفاع کے مطابق ترکی، پاکستان، مصر، سوڈان اور جبوتی سمیت 14 ممالک نے ایک مشترکہ بیان کے ذریعے مجوزہ اتحاد کی حمایت کی ہے، جبکہ خلیجی ممالک عمان اور متحدہ عرب امارات اس مشترکہ بیان کی حمایت کرنے والے ممالک میں شامل نہیں تھے۔