خلیجِ عمان میں امریکی آپریشن، ایرانی آئل ٹینکر ناکارہ بنا دیا گیا

واشنگٹن (ڈیلی اردو) امریکی سینٹرل کمانڈ سینٹ کام  کے مطابق خلیجِ عمان میں ایک ایرانی پرچم بردار آئل ٹینکر ’ایم ٹی حسنا‘ کو فضائی اور بحری کارروائی کے ذریعے ناکارہ بنا دیا گیا۔

سوشل میڈیا پر جاری بیان میں امریکی فوج نے کہا کہ مذکورہ ٹینکر امریکی پابندیوں کی خلاف ورزی کرتے ہوئے ایک ایرانی بندرگاہ کی جانب بڑھ رہا تھا۔ بیان کے مطابق متعدد بار وارننگ دینے کے باوجود جہاز نے راستہ تبدیل نہیں کیا۔

امریکی حکام نے بتایا کہ کارروائی کے دوران امریکی بحریہ کے جیٹ طیارے سے کینن گن فائر کیا گیا، جس کے نتیجے میں آئل ٹینکر کو شدید نقصان پہنچا اور وہ مکمل طور پر ناکارہ ہو گیا۔

بیان میں مزید کہا گیا ہے کہ ’ایم ٹی حسنا‘ اب ایران کی سمت سفر نہیں کر رہا، جبکہ ایران کی بندرگاہوں کی طرف آنے یا جانے والے جہازوں پر امریکی پابندیاں بدستور نافذ العمل ہیں۔

امریکی حکام کے مطابق یہ کارروائی خطے میں سمندری راستوں پر پابندیوں کے نفاذ اور امریکی پالیسی کے تحت کی گئی۔