خیبر میں پولیو ٹیم کی سکیورٹی پر تعینات پولیس اہلکار ہلاک، جوابی کارروائی میں دہشتگرد بھی مارا گیا

باڑہ (نمائندہ ڈیلی اردو/ٹی این این) صوبہ خیبر پختونخوا کے قبائلی ضلع خیبر میں پولیو ٹیم کی سکیورٹی پر تعینات پولیس اہلکاروں پر دہشت گردوں نے فائرنگ کی ہے جس کے نتیجے میں ایک اہلکار ہلاک ہوگیا جبکہ جوابی فائرنگ سے ایک دہشت گرد بھی مارا گیا۔

پولیس کے مطابق واقعہ جمعے کے روز تحصیل باڑہ کے قریب نالہ خوڑ میں پیش آیا ہے جہاں پولیو سیکورٹی ڈیوٹی سے واپسی پر پولیس اہلکاروں پر دہشت گردوں نے فائرنگ کی۔ فائرنگ کی وجہ سے ایک پولیس اہلکار صدیق جاں ہلاک ہوگیا۔

خیبر: علاقہ باڑہ نالہ خوڑ کے قریب پولیو سیکیورٹی پر مامور پولیس اور دہشت گردوں کے مابین مقابلے میں کانسٹیبل صدیق شہادت کے عظیم مرتبے پر فائز ہوگئے
پولیس نے حملہ آور دہشت گرد کو بھی موقع پر ہلاک کردیا۔ pic.twitter.com/mPJzclOaLK

— KP Police (@KP_Police1) December 1, 2023

پولیس کی طرف سے جوابی فائرنگ سے ایک دہشت گرد موقع پر مارا گیا۔ واقعے کے بعد پولیس کی بھاری نفری و افسران موقع پر پہنچ گئے۔ پولیس نے علاقے کو گھیرے میں لے کر سرچ آپریشن شروع کردی ہے۔

یاد رہے گزشتہ روز بنوں میں بھی پولیو کی ڈیوٹی پر تعینات پولیس اہلکار کو فائرنگ کرکے ہلاک کردیا گیا تھا۔ پولیس اہلکار بدھ کے روز منڈان روڈ پر پولیو ڈیوٹی کیلئے جا رہا تھا کہ اچانک دہشت گردوں نے ان پر فائرنگ کی۔ فائرنگ کے نتیجے میں ڈیوٹی پر مامور پولیس اہلکار اشرف خان ہلاک ہوگئے تھے۔

دو روز قبل بھی بنوں میں پولیو ڈیوٹی پر تعینات پولیس اہلکار کو نامعلوم افراد نے فائرنگ کرکے زخمی کردیا تھا۔ پولیس کے مطابق علاقہ سورانی طورکہ بازار بی ایچ یو زروام میں پولیس اہلکار پر نامعلوم افراد نے فائرنگ کی۔ فائرنگ کے نتیجے میں ڈیوٹی پر معمور پولیس اہلکار عبدالحمید زخمی ہوگیا تھا۔