خیبر: وادی تیراہ میں پاکستانی طالبان کے ہاتھوں 4 مزدور اغوا

خیبر (ڈیلی اردو) پاکستان کے شورش زدہ صوبے خیبر پختونخوا کے قبائلی ضلع خیبر کی دور افتادہ علاقے وادی تیراہ کے راجگال کوکی خیل میں سڑک کی تعمیر پر کام کرنے والے چار مزدوروں کو نامعلوم مسلح افراد نے اغوا کر کے نامعلوم مقام پر منتقل کر دیا۔

ذرائع کے مطابق اغوا ہونے والوں میں ایکسیویٹر آپریٹر حلیم شاہ ولد رحیم شاہ قوم مندوخیل سکنہ زوب بلوچستان ایکسیویٹر آپریٹر جنت خان ولد عبدالکریم قوم کاکڑ، سکنہ ژوب بلوچستان جبکہ ان کے ساتھ احسان اللہ ولد محمد حسین قوم مندوخیل سکنہ ژوب بلوچستان) اور ایک مزدور خان نامی شامل ہیں۔ 

یہ تمام افراد معمول کے مطابق تعمیراتی کام میں مصروف تھے کہ مسلح شدت پسند گروپ نے انہیں زبردستی اپنے ساتھ لے جا کر نامعلوم مقام پر منتقل کر دیا۔

بعد ازاں پاکستانی طالبان نے ان افراد کے اغوا کی ذمہ داری بھی قبول کر لی ہے تاہم مغویوں کی حالت اور مقام کے حوالے سے تاحال کوئی مستند معلومات سامنے نہیں آ سکیں۔

واقعے کے بعد علاقے میں شدید خوف و ہراس پھیل گیا ہے جبکہ سیکیورٹی اداروں اور مقامی انتظامیہ نے واقعے کا نوٹس لیتے ہوئے تلاش کا عمل شروع کر دیا ہے۔

دوسری جانب عوامی اور سیاسی حلقوں کی جانب سے واقعے پر سخت ردعمل سامنے آیا ہے۔ مقامی عمائدین اور سیاسی رہنماؤں نے حکومت سے مطالبہ کیا ہے کہ وادی تیراہ کے دور افتادہ علاقوں میں جاری ترقیاتی منصوبوں کو فوری طور پر مؤثر سیکیورٹی فراہم کی جائے ٹھیکیداروں اور مزدوروں کے تحفظ کو یقینی بنایا جائے بصورت دیگر ترقیاتی کام رکنے کا خدشہ ہے کیونکہ ٹھیکیدار عدم تحفظ کے باعث کام چھوڑنے پر مجبور ہو سکتے ہیں۔