خیبر: وادی تیراہ میں چیک پوسٹ پر خودکش حملہ، سیکورٹی فورسز کے 3 اہلکار زخمی

اسلام آباد (ش ح ط) صوبہ خیبر پختونخوا کے قبائلی ضلع خیبر کی دور افتادہ علاقے وادی تیراہ میں سکیورٹی فورسز کے چیک پوسٹ پر ایک خودکش حملے میں تین اہلکار زخمی ہوگئے۔

پولیس حکام کے مطابق بدھ کی علی الصبح پشاور سے 120 کلومیٹر دور وادی تیراہ کے علاقے اکاخیل میں ایک مبینہ خودکش بمبار نے بارود سے بھری گاڑی سکیورٹی فورسز کی سروزئے چیک پوسٹ سے ٹکرا دی۔

https://twitter.com/ShabbirTuri/status/1717089825030091121?t=oUjO0h5NiSTuTUt5q5Ej-Q&s=19

پولیس کا کہنا ہے کہ دھماکے میں چیک پوسٹ بھی مکمل طور تباہ ہوگئی ہے جبکہ قریب کھڑی سیکیورٹی فورسز کی گاڑیوں کو بھی نقصان پہنچا ہے۔ حکام کا کہنا ہے کہ زخمیوں کو قریبی ہسپتال پہنچا دیا گیا ہے۔

عینی شاہدین کا کہنا ہے کہ دھماکہ کے بعد سکیورٹی فورسز نے شدید فائرنگ بھی کی جس میں کسی جانی نقصان کی اطلاع نہیں ملی ہے۔

زخمیوں میں صوبیدار محمد اسرار، سپاہی افتخار اور سپاہی شفیق شامل ہے۔

واضح رہے کہ 20 جولائی کو ضلع خیبر کے علاقے باڑہ میں تحصیل کمپاؤنڈ پر دھماکوں میں 3 پولیس اہلکار ہلاک جبکہ 8 زخمی ہو گئے تھے۔ پولیس نے بتایا تھا کہ اس نے دو حملہ آوروں کو روکنے کی کوشش کی جس پر انہوں نے خود کو دھماکے سے اڑا لیا۔

خیال رہے کہ وادی تیراہ کی سرحدیں دو دیگر قبائلی علاقوں کرم اور اورکزئی ایجنسی سے بھی ملتی ہیں اور تقریباً 100 کلومیٹر پر پھیلی اس وادی کا بیشتر حصہ جنگلات سے ڈھکا ہوا ہے جہاں کالعدم تنظیموں نے اپنی پناہ گاہیں قائم کر رکھی ہیں۔