خیبر پختونخوا میں دہشتگردی کا بڑا منصوبہ ناکام، خودکش جیکٹس اور بارودی مواد برآمد

پشاور (ڈیلی اردو) کے پی پولیس اور حساس اداروں نے صوبہ خیبر پختونخوا کے ضلع لوئر دیر میں آپریشن کے دوران خطرناک دہشت گرد گرفتار کر لیا جس کی نشاندہی پر زمین میں چھپایا گیا 8 کلو بارود، خودکش جیکٹس اور اسلحہ بھی برآمد کر لیا گیا۔

تفصیلات کے مطابق ضلع لوئر دیر دہشتگردی کی بڑی کاروائی سے بچ گیا ، دہشت گردوں کی اطلاع پر پولیس اور حساس اداروں نےخفیہ کارروائی کے دوران دوست محمد نامی دہشت گرد کو گرفتار کر لیا، تفتیش پر دہشتگرد نے گولہ بارود اور اسلحے کے ذخیرے کی نشاندہی کی جہاں زمین میں دفنائی گئیں خودکش جیکٹس، آر پی جی گولے، سیفٹی فیوز اور آٹھ کلو بارود کو قبضے میں لے لیا گیا ہے۔

واضح رہے کہ دہشت گرد دوست محمد پہلے بھی 2 بار جیل کاٹ چکا ہے۔

حکام کے مطابق ملزم سے اہم انکشافات متوقع ہیں۔ دہشت گرد کو مزید تفتیش کیلئے نامعلوم مقام پر منتقل کر دیا گیا۔