دمشق: داخلی سیکورٹی فورسز کی کاروئی ، سابق نظام کا اہم کمانڈر ہلاک

دمشق(ڈیلی اردو) شام کے صوبہ طرطوس کے دیہی علاقے میں داخلی سیکیورٹی فورسز اور انسدادِ دہشتگردی کے شعبے نے مشترکہ کارروائی کرتے ہوئے سابق نظام کے مبینہ مسلح گروہوں سے وابستہ ایک اہم کمانڈر کو ہلاک کر دیا۔

سرکاری خبر رساں ادارے کے مطابق کارروائی شہر صافیتا میں ایک خفیہ ٹھکانے پر کی گئی، جہاں سیکیورٹی فورسز نے چھاپہ مارا۔ حکام کے مطابق کارروائی کے دوران مذکورہ شخص نے فائرنگ شروع کردی، جس کے بعد سیکیورٹی اہلکاروں اور اس کے درمیان فائرنگ کا تبادلہ ہوا اور وہ ہلاک ہوگیا۔

سیکیورٹی حکام کے مطابق ہلاک ہونے والے شخص کی شناخت فراس عبدالکریم حمود کے نام سے ہوئی ہے، جسے ’الخال‘ کے نام سے بھی جانا جاتا تھا۔ حکام کا دعویٰ ہے کہ وہ سابق حکومت کے دور میں  ’25ویں ڈویژن‘ کی اسپیشل فورسز کا کمانڈر رہ چکا تھا اور بعد میں ساحلی علاقوں میں سابق نظام کے حامی مسلح گروہوں کی سرگرمیوں میں بھی کردار ادا کرتا رہا۔

حکام کے مطابق مذکورہ شخص پر سرکاری تنصیبات پر مسلح حملوں، سیکیورٹی اور فوجی اہلکاروں کو ہلاک کرنے اور بعض اہلکاروں کو یرغمال بنانے کے علاوہ سرکاری مراکز اور شہریوں کو نشانہ بنانے کے لیے مسلح گروہ تشکیل دینے کے الزامات بھی تھے۔

سیکیورٹی فورسز کا کہنا ہے کہ کارروائی سے قبل اس کی نقل و حرکت پر نظر رکھی گئی اور مختلف علاقوں میں منتقل ہونے کے بعد بالآخر صافیتا میں اس کے مبینہ ٹھکانے کا پتا لگایا گیا۔

حکام کے مطابق گزشتہ ماہ بھی داخلی سیکیورٹی فورسز نے سابق نظام کے دور میں شہریوں کے خلاف مبینہ جنگی جرائم اور بعد ازاں تخریبی سرگرمیوں میں ملوث ایک شخص کو گرفتار کیا تھا۔