دہلی میں کشیدہ صورتحال کا دنیا کو فوری نوٹس لینا چاہیے، وزیر خارجہ

اسلام آباد (ڈیلی اردو/این این آئی) وزیر خارجہ مخدوم شاہ محمود قریشی نے کہاہے کہ بھارتی دارالحکومت دہلی میں دس سے زیادہ اموات ہو چکی، کشیدہ صورتحال کا دنیا کو فوری نوٹس لینا چاہیے، صدر ٹرمپ نے وزیراعظم عمران خان کے ساتھ کیے گئے وعدے کے مطابق کشمیر کے حوالے سے بھارتی وزیر اعظم سے بات کی ہے،مقبوضہ جموں و کشمیر کی تشویشناک صورتحال اور دنیا بھر کے رد عمل کو پیش نظر رکھتے ہوئے، صدر ٹرمپ کی طرف سے بار دگر ثالثی کی پیش کش، بھارتی بیانیے کی نفی ہے۔

بدھ کو ایک بیان میں شاہ محمود قریشی نے کہا کہ بھارتی میڈیا نے صدر ٹرمپ کی پریس کانفرنس کو اپنے مقاصد میں استعمال کرنے کی کوشش کی تاہم صدر ٹرمپ نے دہشت گردی کے خلاف پاکستان کی کاوشوں کو سراہا، پاکستان جو ایک عرصے سے کہتا چلا آ رہا ہے کہ بھارت میں مسلمان عدم تحفظ کا شکار ہیں۔

انہوں نے کہا کہ گذشتہ دو روز سے دہلی میں دس سے زیادہ اموات ہو چکی ہیں عمارتوں کو نذر آتش کیا جا رہا ہے پیٹرول پمپس اور کاروباری مراکز کو جلایا جا رہا ہے، دنیا کو اس صورت حال کا فوری نوٹس لینا چاہئے۔

انہوں نے کہا کہ امریکی صدر ٹرمپ نے ہزاروں لوگوں کی موجودگی میں واشگاف الفاظ میں کہا ہے کہ عمران خان میرے دوست ہیں اور پاکستان نے بہترین حکمت عملی سے دہشت گردی کو شکست دی ہے۔

انہوں نے کہا کہ صدر ٹرمپ نے وزیراعظم عمران خان کے ساتھ کیے گئے وعدے کے مطابق کشمیر کے حوالے سے بھارتی وزیر اعظم سے بات کی ہے۔

انہوں نے مزید کہا کہ مقبوضہ جموں و کشمیر کی تشویشناک صورتحال اور دنیا بھر کے رد عمل کو پیش نظر رکھتے ہوئے، صدر ٹرمپ کی طرف سے بار دگر ثالثی کی پیش کش، بھارتی بیانیے کی نفی ہے۔