دیر بالا، دہشتگردوں کا چیک پوسٹوں پر حملہ ، مقامی افراد اسلحہ اٹھا کر پولیس کی مدد کےلئے پہنچ گئے

دیر بالا(ڈیلی اردو)خیبرپختونخواہ کے شورش زدہ  ضلع دیر بالا میں دو پولیس چیک پوسٹوں کو دہشتگردوں کی جانب سے نشانہ بنائے جانے کے بعد علاقے میں سکیورٹی صورتحال کشیدہ ہوگئی، جبکہ مقامی افراد پولیس اہلکاروں کی مدد کے لیے گھروں سے نکل آئے۔

مقامی ذرائع کے مطابق نہاگدرہ، لرجم اور عشیری درہ کے رہائشی پولیس کے ساتھ تعاون کے لیے مسلح ہوکر مختلف مقامات پر پہنچے اور علاقے کے امن کے تحفظ میں پولیس کا ساتھ دینے کے عزم کا اظہار کیا۔

اطلاعات کے مطابق فائرنگ کے ایک واقعے میں ڈی پی او دیر بالا اور پاکستان مسلم لیگ (ن) کے ضلعی صدر نثار وردگ کی گاڑی کو بھی نشانہ بنایا گیا، تاہم دونوں محفوظ رہے۔

واقعے کے بعد سکیورٹی مزید بڑھا دی گئی ہے جبکہ پولیس اور دیگر قانون نافذ کرنے والے ادارے صورتحال کی نگرانی کر رہے ہیں۔