رمضان شوگر ملز کیس: حمزہ شہباز کے جوڈیشل ریمانڈ میں 16 روز کی توسیع

لاہور (ڈیلی اردو) احتساب عدالت نے رمضان شوگر ملز کیس میں گرفتار حمزہ شہباز کے جوڈیشل ریمانڈ میں سولہ روز کی توسیع کردی ہے۔

تفصیلات کے مطابق لاہور کی احتساب عدالت میں رمضان شوگر ملز کیس کی سماعت ہوئی،جوڈیشل ریمانڈ مکمل ہونے پر حمزہ شہباز کو عدالت میں پیش کیا گیا۔

سماعت کے دوران عدالت کے باربار بلانے پر فاضل جج نے حمزہ شہباز پر برہمی کا اظہار کرتے ہوئے ریمارکس دیئے کہ کٹہرے میں آ ئیں، آپ یہاں پریس کانفرنس کرنے نہیں آئے،جس پر حمزہ شہباز نے کہا کہ آپ مجھ سے بات کیسے کر رہے ہیں ، کٹہرے میں آ رہا ہوں ،بات کرنے کا طریقہ مناسب نہیں ہے۔

اس موقع پر فاضل جج کے اظہار برہمی پر کمرہ عدالت میں موجود لیگی ارکان نے نعرے لگائے، جس پر فاضل جج نے ریمارکس دیئے کہ اگر آپ نے ملنا ہے تو باہر ملیں، عدالت کے وقار کو ملحوظ خاطر رکھیں۔

جواب میں حمزہ شہباز نے عدالت کو بتایا کہ آپ کا احترام کرتا ہوں ، میرے ساتھ کوئی بھی نہیں آیا،رش میں آتا ہوں اگر کوئی سلام دے تو شرعاً جواب دیتا ہوں۔

دوران سماعت عدالت نے استفسار کیا کہ شہباز شریف کہاں ہیں ، جس پر عدالت کو آگاہ کیا گیا کہ شہباز شریف قومی اسمبلی کے اجلاس میں شرکت کیلئے گئے ہیں،عدالت نے ریمارکس دیئے کہ آپ نے درخواست دی لیکن دستاویزات ساتھ لگائی نہیں، آئندہ ایسی غلطی نہیں ہو نی چاہیے، اسمبلی کا اجلاس کب تک جاری رہے گا؟۔

بعد ازاں عدالت نے حمزہ شہباز کے جسمانی ریمانڈ میں 28نومبر تک توسیع کردی۔