روس اور افغان طالبان کے درمیان فضائی دفاعی نظام اور فوجی تعاون کا معاہدہ

ماسکو (ڈیلی اردو) افغان طالبان حکومت کے وزیر دفاع ملا محمد یعقوب مجاہد کے حالیہ دورۂ روس کے دوران ماسکو اور کابل کے درمیان جدید فضائی دفاعی نظام سمیت فوجی تعاون کے ایک معاہدے پر پیش رفت سامنے آئی ہے۔

ذرائع کے مطابق طالبان حکومت روس کو اس بات پر آمادہ کرنے میں کامیاب ہو گئی ہے کہ وہ افغانستان کو جدید فضائی دفاعی نظام فراہم کرے۔ بتایا گیا ہے کہ یہ معاملہ پہلے سے زیرِ غور تھا تاہم حالیہ دورے کے دوران اس حوالے سے عملی پیش رفت ہوئی۔

ذرائع کا کہنا ہے کہ ابھی یہ واضح نہیں کہ معاہدے میں صرف فضائی دفاعی ساز و سامان شامل ہے یا اس میں ڈرونز اور دیگر حملہ آور ہتھیار بھی شامل ہیں، تاہم دونوں فریقوں کے درمیان طے پانے والے معاہدے میں فضائی دفاعی آلات کے ساتھ زمینی فوجی ساز و سامان اور طالبان افواج کی تربیت بھی شامل ہے۔

یہ معاہدہ روسی دارالحکومت ماسکو میں روسی سلامتی کونسل کے مشیر سرگئی شوئیگو اور طالبان وزیر دفاع ملا محمد یعقوب مجاہد کی موجودگی میں طے پایا۔

ملا محمد یعقوب مجاہد بین الاقوامی سکیورٹی فورم میں شرکت کے لیے ماسکو پہنچے تھے، جہاں انہوں نے روسی حکام سے ملاقاتوں کے دوران دوطرفہ دفاعی تعاون بڑھانے پر زور دیا۔

روس ان چند ممالک میں شامل ہے جنہوں نے 2021 میں طالبان کے اقتدار سنبھالنے کے بعد بھی کابل میں اپنا سفارت خانہ بند نہیں کیا۔ دونوں فریق گزشتہ چند برسوں کے دوران اقتصادی، سیاسی اور سکیورٹی شعبوں میں تعلقات مضبوط بنانے کی کوششیں کرتے رہے ہیں۔

پاکستان اور افغانستان کے درمیان حالیہ کشیدگی اور سرحدی تنازعات کے تناظر میں یہ پہلا موقع ہے کہ طالبان حکومت نے کسی علاقائی ملک کے ساتھ اس نوعیت کے فوجی اور تکنیکی تعاون کو باضابطہ شکل دی ہے۔