سرگودھا: احمدی ڈاکٹر کو ہسپتال کی سیڑھیوں پر گولیاں مار کر ہلاک کر دیا گیا

سرگودھا (نمائندہ ڈیلی اردو/بی بی سی) پاکستان کے صوبہ پنجاب کے شہر سرگودھا میں جمعہ کے روز ایک نجی ہسپتال میں کام کرنے والے احمدی ڈاکٹر شیخ محمد محمود کو فائرنگ کر کے ہلاک کر دیا گیا۔ واقعہ فاطمہ ہسپتال سرگودھا میں پیش آیا جہاں وہ معمول کے مطابق کام پر آ رہے تھے۔

ڈیلی اردو کے مطابق،سرگودھا کے معروف میڈیکل سپیشلسٹ ڈاکٹر شیخ محمد محمود جب ہسپتال کی سیڑھیاں چڑھ رہے تھے تو سویپر کی یونیفارم میں ملبوس ایک نامعلوم شخص نے ان پر اندھا دھند فائرنگ کر دی اور موقع سے فرار ہو گیا۔

ڈاکٹر محمود کو شدید زخمی حالت میں فوری طور پر ڈی ایچ کیو ہسپتال سرگودھا منتقل کیا گیا، تاہم وہ زخموں کی تاب نہ لاتے ہوئے دم توڑ گئے۔ ہسپتال میں ضابطے کی کارروائی جاری ہے۔

واقعے کی اطلاع ملتے ہی ضلعی پولیس افسر (ڈی پی او) سرگودھا محمد صہیب اشرف پولیس نفری کے ہمراہ جائے وقوعہ پر پہنچے۔ کرائم سین یونٹ اور فرانزک ٹیموں نے موقع سے شواہد اکٹھے کرنے کا عمل شروع کر دیا ہے۔

مقامی ذرائع کے مطابق ڈاکٹر محمود کو کچھ عرصے سے تحریک لبیک پاکستان (ٹی ایل پی) سے وابستہ عناصر کی جانب سے دھمکیاں دی جا رہی تھیں.

جماعت احمدیہ پاکستان کے ترجمان عامر محمود اور مقتول ڈاکٹر کے اہلِ خانہ نے بی بی سی کو ان کی ہلاکت کی تصدیق کرتے ہوئے دعویٰ کیا ہے کہ ڈاکٹر شیخ محمد محمود کو کچھ عرصے سے احمدیہ مخالف گروہوں کی جانب سے دھمکیاں دی جا رہی تھیں۔

عامر محمود کے مطابق، گزشتہ ایک ماہ کے دوران پاکستان میں تین احمدی شہریوں کو مذہبی بنیاد پر نشانہ بنایا جا چکا ہے، جن میں ڈاکٹر محمود بھی شامل ہیں۔

ڈاکٹر محمود کے سوگواران میں اہلیہ، دو بیٹیاں اور دو بیٹے شامل ہیں۔ پولیس نے واقعے کے بعد جائے وقوعہ سے شواہد اکٹھے کر کے تفتیش کا آغاز کر دیا ہے، تاہم تاحال کسی گرفتاری کی اطلاع موصول نہیں ہوئی۔

جماعت احمدیہ نے حکومت سے مطالبہ کیا ہے کہ اقلیتی برادری کو تحفظ فراہم کیا جائے اور اس حملے کی شفاف تحقیقات کر کے ذمہ داروں کو انصاف کے کٹہرے میں لایا جائے۔