سری لنکا سے 32 سیلرز سمیت ایرانی بحریہ کے 238 ارکان کی وطن واپسی

کولمبو (ڈیلی اردو، اے ایف پی، روئٹرز) جنوبی ایشیا کی جزیرہ ریاست سری لنکا میں حکام نے 17 اپریل جمعے کے روز بتایا کہ ایرانی بحریہ کے 238 ارکان کو واپس ایران بھیج دیا گیا ہے۔ ان میں 32 ایسے ایرانی سیلرز بھی شامل ہیں، جو اس ایرانی بحری جہاز کے عملے کے ارکان تھے، جسے امریکی بحریہ نے بحر ہند میں حملہ کر کے ڈبو دیا تھا۔

اس ایرانی نیول شپ کے 32 ارکان کو سری لنکا کی بحریہ نے سمندر سے بروقت ریسکیو کر لیا تھا اور وہ اب تک سری لنکا ہی میں تھے۔

ان کے شپ کو امریکہ کی ایک آبدوز نے چار مارچ کے روز ایک تارپیڈو حملہ کر کے تباہ کر دیا تھا اور یہ شپ سمندر میں ڈوب گیا تھا۔

تب یہ ایرانی بحری جہاز بھارت کی دعوت پر سمندری فوجی مشقوں میں حصہ لے کر واپس ایران لوٹ رہا تھا۔

اس جہاز پر حملے کے نتیجے میں اس کے عملے کے 87 ارکان کی لاشیں سری لنکن نیوی نے سمندر سے نکال لی تھیں، جبکہ 32 افراد کو زندہ ریسکیو کیا گیا تھا، جو بعد میں طویل عرصے تک ہسپتال میں زیر علاج رہے تھے۔

ان افراد کے علاوہ سری لنکا کی بحریہ نے بحر ہند میں ایران کے ایک اور نیول شپ کے عملے کے بیسیوں ارکان کو بھی ریسکیو کیا تھا۔ واپس ایران بھیجے جانے والے 238 ایرانی سیلرز میں بڑی تعداد اسی دوسرے جہاز کے عملے کے ارکان کی تھی۔

کولمبو میں ملکی وزارت دفاع کے ترجمان نے بتایا کہ اب سری لنکا میں ایرانی نیوی کے ارکان کی بہت ہی کم تعداد باقی ہے، اور دونوں ایرانی بحری جہازوں کے عملے کے افراد میں سے چند ایک کے سوا باقی تمام واپس ایران بھیجے جا چکے ہیں۔