سعودی اتحاد کی یمن میں حوثیوں کے ٹھکانوں پر شدید بمباری

ریاض (ڈیلی اردو/نیوز ایجنسی) یمن میں حجہ صوبے کے مختلف علاقوں میں حوثیوں کے ٹھکانوں پر یمنی فوج کی گولہ باری اور اتحادی طیاروں کی بم باری کے نتیجے میں حوثی ملیشیا کے 36 اہلکار جاں بحق اور درجنوں زخمی ہو گئے۔

غیرملکی خبررساں ادارے کے مطابق یمنی مسلح افواج کے میڈیا سینٹر کے ایک بیان میں کہا گیا کہ اتحادی طیاروں نے عبس ضلع کے شمال میں عزلہ بنی حسن کے علاقے میں حوثیوں کے جتھوں کو نشانہ بنایا۔اس دوران حوثی ملیشیا کے 36 اہلکار اپنی جانوں سے ہاتھ دھو بیٹھے اور درجنوں زخمی ہو گئے۔

بیان میں عسکری ذرائع کے حوالے سے بتایا گیا کہ یمنی فوج کی توپوں نے گولہ باری سے حیران ضلع کے مشرق میں حوثی عناصر کی گاڑیوں اور لڑائی کے ساز و سامان کو تباہ کر دیا۔

اس سے ایک روز قبل حجہ صوبے میں حیران، عبس اور حرض کے مختلف محاذوں پر حوثی ملیشیا کے حملے کو پسپا بنا دیا گیا۔ کارروائی میں حوثی باغی ملیشیا کے درجنوں ارکان جاں بحق ہوگئےتھے۔  

یمن میں آئینی حکومت کو سپورٹ کرنے والے امریکی سعودی عرب اتحاد کے طیاروں نے حرض ضلع میں کئی ٹھکانوں کو نشانہ بنایا جہاں حوثی ملیشیا کے ارکان موجود تھے۔ اس دوران عبس اور حرض کے مختلف مقامات پر باغیوں کا گولہ بارود، راکٹ لانچرز اور ہتھیاروں کے ڈپو تباہ کر دیے گئے۔