سعودی عرب نے کویت اور بحرین پر حملوں کو ایرانی جارحیت قرار دے دیا

ریاض (ڈیلی اردو) سعودی عرب نے بحرین اور کویت پر ہونے والے حملوں کو ’’ایرانی جارحیت‘‘ قرار دیتے ہوئے ان کی سخت الفاظ میں مذمت کی ہے۔

بدھ کو جاری بیان میں سعودی وزارتِ خارجہ نے کہا کہ سعودی عرب بحرین اور کویت کی خودمختاری کی ’’کھلی خلاف ورزی‘‘ اور خطے میں کشیدگی بڑھانے والی کارروائیوں کی شدید مذمت کرتا ہے۔

سعودی وزارتِ خارجہ کے مطابق یہ حملے خطے میں سکیورٹی اور استحکام بحال کرنے کے لیے جاری بین الاقوامی کوششوں کو نقصان پہنچا رہے ہیں۔

یہ بیان ایسے وقت میں سامنے آیا ہے جب بدھ کی صبح کویت اور بحرین نے ڈرون اور میزائل حملوں کی تصدیق کی تھی۔

بعد ازاں ایران نے ان حملوں کی ذمہ داری قبول کرتے ہوئے کہا کہ امریکی اڈوں اور ہیلی کاپٹروں کو میزائلوں اور ڈرونز سے نشانہ بنانا ’’جوابی کارروائی‘‘ کا حصہ تھا۔

کویت کی وزارتِ صحت کے مطابق ایران کی جانب سے کویت انٹرنیشنل ایئرپورٹ پر کیے گئے میزائل اور ڈرون حملے میں کم از کم 63 افراد زخمی ہوئے، جن میں ایئرپورٹ عملہ اور مسافر بھی شامل ہیں۔

اس سے قبل کویت کی وزارتِ خارجہ نے تصدیق کی تھی کہ ان حملوں میں کم از کم ایک شخص ہلاک بھی ہوا ہے۔

ان حملوں کے بعد خلیجی خطے میں کشیدگی مزید بڑھ گئی ہے جبکہ علاقائی ممالک اور عالمی طاقتیں صورتحال پر گہری نظر رکھے ہوئے ہیں۔