سندھ: سکھر میں سی ٹی ڈی کی کارروائی، کالعدم تنظیم کے 3 دہشت گرد گرفتار

سکھر (ڈیلی اردو) کاؤنٹر ٹیررازم ڈیپارٹمنٹ (سی ٹی ڈی) سندھ نے ضلع سکھر میں کارروائی کرتے ہوئے کالعدم تنظیم کے 3 دہشت گردوں کو گرفتار کر لیا۔

تفصیلات کے مطابق سی ٹی ڈی ٹیم نے یہ کارروائی جعفرآباد روڈ پر ایک کار کا پیچھا کر کے انجام دی اور گرفتار ملزمان کے قبضے سے ہینڈ گرینیڈ، ٹائمر، ڈیٹو نیٹرز، نٹ بولٹ بال بیرنگ، دھماکہ خیز مواد برآمد کرلیا۔

سی ٹی ڈی ذرائع نے بتایا کہ سی ٹی ڈی ٹیم نے سندھ رولیشنری آرمی کی ذیلی تنظیم سندھ پیپلز آرمی کے سرگرم کارکنان کو گرفتار کیا۔ گرفتار ملزمان میں کرم علی جتوئی،ارشد حسین شیخ اور محمد یوسف کلوڑ شامل ہیں۔

ذرائع کے مطابق گرفتار دہشت گردوں نے ضلع گھوٹکی اور دیگر علاقوں میں پٹھان، پنجابیوں کو نشانہ بنایا جبکہ 13 جنوری 2023 کو محمد یوسف اور اکرم نے مشتاق پٹھان کو فائرنگ کر کے زخمی کیا۔

سی ٹی ڈی ذرائع کا کہنا ہے کہ اس ٹارگٹ کی ہدایت سندھو دیشن پیپلز آرمی کے کمانڈر ذوالفقار خاصخیلی نے کی تھی جبکہ ذوالفقار خاصخیلی نے اس کارروائی کے لیے بھاری رقم بھی مذکورہ دہشت گردوں کو ادا کی۔

ذرائع نے مزید بتایا کہ گرفتار دہشت گرد مزید کارروائیوں کی منصوبہ بندی کر رہے تھے، گرفتار دہشت گرد سندھ میں بدامنی پھیلانا چاہتے تھے۔