سندھ، پنجاب میں جلوس عزا پر پولیس کا لاٹھی چارج ناقابلِ برداشت ہے: علامہ باقر عباس زیدی

کراچی (ڈیلی اردو) مجلس وحدت مسلمین پاکستان صوبہ سندھ کے سیکرٹری جنرل علامہ باقر عباس زیدی نے کہا ہے کہ عزاداری سید الشہداء کی راہ میں کسی قسم کی رکاوٹ کو برداشت نہیں کیا جائے گا۔ سندھ اور پنجاب سمیت ملک کے مختلف اضلاع میں نواسۂ رسولﷺ کی یاد میں منعقد کی جانے والی مجالس اور جلوس ہائے عزا کی راہ میں رکاوٹیں کھڑی کرنا ملت جعفریہ پاکستان کے بنیادی حقوق مسخ کرنے کے مانند ہے۔

علامہ باقر زیدی نے میڈیا سیل سے جاری بیان میں مزید کہا کہ ملت جعفریہ پاکستان کے قیام سے قبل ہی عزاداری سید الشہداء کو انجام دیتی آرہی ہے۔ پاکستان کے قیام میں ملت جعفریہ پاکستان کے اکابرین کی بیش بہا قربانیاں شامل ہیں۔

انہوں نے مزید کہا کہ آج دنیا بھر میں حریت پسند افراد امام حسین ؑ سے درس حریت لے کر اپنی آزادی کی جدوجہد میں مصروف ہیں۔ پاکستان میں گزشتہ کئی سالوں سے عزاداری امام حسینؑ کی راہ میں رکاوٹیں کھڑی کی جارہی ہیں۔

علامہ باقر زیدی کا کہنا تھا کہ محرم الحرام ہمیں مظلومین جہاں کی نصرت وحمایت کا درس دیتا ہے۔ آج کشمیر، فلسطین، یمن اور بحرین کے مظلومین کی حمایت اور ان کی مدد کرنا ہم پر فرض ہے۔