سوات میں 59 مطلوب دہشتگردوں کی فہرست جاری، اطلاع دینے والوں کے لیے انعام کا اعلان

سوات (ڈیلی اردو)خیبرپختونخواہ کے ضلع سوات میں  سیکیورٹی فورسز اور قانون نافذ کرنے والے اداروں نے مطلوب 59 دہشتگردوں کی فہرست جاری کرتے ہوئے شہریوں سے ان کی گرفتاری اور شناخت میں تعاون کی اپیل کی ہے۔

حکام کے مطابق فہرست میں شامل افراد کے بارے میں قابلِ اعتماد معلومات فراہم کرنے والے شہریوں کو نقد انعام دیا جائے گا۔ عوام سے کہا گیا ہے کہ اگر کسی شخص کے پاس مطلوب افراد کی موجودگی، شناخت یا نقل و حرکت سے متعلق مصدقہ معلومات ہوں تو وہ فوری طور پر متعلقہ سیکیورٹی یا قانون نافذ کرنے والے اداروں کو آگاہ کرے۔

حکام نے واضح کیا ہے کہ اطلاع دینے والے شہری کی شناخت صیغہ راز میں رکھی جائے گی۔ شہریوں کو ہدایت کی گئی ہے کہ وہ مطلوب یا مشتبہ افراد کے خلاف خود کارروائی کرنے کے بجائے معلومات متعلقہ اداروں تک پہنچائیں۔