سوڈان میں ڈرون حملہ، 17 طالبات ہلاک، 10 زخمی

خرطوم (ڈیلی اردو) سوڈان کے وائٹ نائل صوبے کے شوکیری گاؤں میں دھماکہ خیز مواد سے بھرے ڈرون کے حملے میں 17 افراد ہلاک جبکہ 10 زخمی ہو گئے۔ یہ حملہ سوڈان میں تقریباً تین سال سے جاری جنگ کے دوران ہونے والے حالیہ مگر انتہائی مہلک حملوں میں سے ایک قرار دیا جا رہا ہے۔

دویم ہسپتال کے ڈائریکٹر ڈاکٹر موسیٰ المجیری اور سوڈان ڈاکٹرز نیٹ ورک کے مطابق بدھ کے روز جنوبی سوڈان کے اس گاؤں میں ایک ڈرون ثانوی اسکول اور صحت کے مرکز پر گرا، جس کے نتیجے میں ہلاک ہونے والوں میں زیادہ تر اسکول کی طالبات شامل ہیں۔ تنظیم کے مطابق ہلاک افراد میں دو اساتذہ اور ایک طبی کارکن بھی شامل ہیں۔

طبی ذرائع کا کہنا ہے کہ حملے کے وقت گاؤں میں کسی قسم کی فوجی موجودگی نہیں تھی۔ ڈاکٹر موسیٰ المجیری اور سوڈان ڈاکٹرز نیٹ ورک نے اس حملے کا الزام ریپڈ سپورٹ فورسز پر عائد کیا ہے، تاہم اس گروپ نے خبر رساں ادارے کی جانب سے تبصرے کی درخواست کا کوئی جواب نہیں دیا۔

یاد رہے کہ سوڈان اپریل 2023 میں اس وقت شدید بحران میں داخل ہوا تھا جب سوڈانی فوج اور ریپڈ سپورٹ فورسز کے درمیان اقتدار کی کشمکش کھلی جنگ میں تبدیل ہو گئی تھی، جس کے بعد دارالحکومت خرطوم سمیت مختلف علاقوں میں شدید لڑائی شروع ہو گئی۔

اقوام متحدہ کے مطابق اس تباہ کن جنگ میں اب تک 40 ہزار سے زائد افراد ہلاک ہو چکے ہیں، تاہم امدادی اداروں کا کہنا ہے کہ اصل تعداد اس سے کہیں زیادہ ہو سکتی ہے۔