سی ٹی ڈی کی صوابی میں کارروائی، کالعدم ٹی ٹی پی کے 2 دہشت گرد گرفتار

پشاور (نمائندہ ڈیلی اردو) کاؤنٹر ٹیررازم ڈیپارٹمنٹ (سی ٹی ڈی)خیبر پختونخوا نے ضلع صوابی میں کارروائی کرتے ہوئے کالعدم تنظیم کے دو دہشت گردوں کو گرفتارکر لیا۔

ایڈیشنل انسپکٹر جنرل شوکت عباس نے پشاور میں پریس کانفرنس کرتے ہوئے کہا کہ دہشت گردوں نے رمضان میں صوابی میں پولیس گاڑی کو گشت کے دوران نشانہ بنایا تھا، حملے میں دو پولیس اہلکار ہلاک اور ایک زخمی ہوا تھا۔

اس موقع ڈی آئی جی، سی ٹی ڈی کا کہنا تھا کہ دہشت گردوں کا گروہ 2016 سے مختلف واقعات میں ملوث ہے جس میں ایک دہشت گرد عطااللہ امام مسجد تھا، جس نے بچوں کا برین واش کیا، دہشت گردی میں اندرونی اور بیرونی دونوں عوامل شامل ہیں۔

ڈی آئی جی سی ٹی ڈی کے مطابق دہشت گرد گروہ پولیس اہلکاروں کی ٹارگٹ کلنگ میں ملوث تھا، گرفتار ملزمان کے قبضے سے دستی بم اور اسلحہ بھی برآمد کیا گیا ہے۔

ڈی آئی جی سی ٹی ڈی شوکت عباس نے بتایا کہ دہشت گردوں کا تعلق کالعدم تنظیم تحریک طالبان پاکستان (ٹی ٹی پی) سیف اللہ گروپ سے ہے، گرفتار دہشت گردوں کے پانچ حملوں میں سات پولیس پولیس اہلکار ہلاک ہوئے۔

انہوں نے مزید بتایا کہ باجوڑ ایف سی گاڑی حملے میں ملوث خودکش حملہ آور کی شناخت ہو چکی ہے جبکہ جے یو آئی جلسے میں ہونے والے حملے میں بھی کچھ گرفتاریوں کیں ہیں۔