سی ٹی ڈی کی پنجاب میں کارروائیاں، ’را‘ سے تعلق رکھنے والے 2 دہشتگرد گرفتار

لاہور (نمائندہ ڈیلی اردو) پاکستان کے صوبہ پنجاب کے اضلاع ساہیوال اور اوکاڑہ میں قانون نافذ کرنے والے اداروں نے دہشت گردی کا منصوبہ ناکام بنانے کا دعویٰ کرتے ہوئے بھارتی خفیہ ایجنسی ’را‘ سے مبینہ تعلق رکھنے والے 2 افراد کو گرفتار کر لیا ہے۔

کاؤنٹر ٹیررازم ڈیپارٹمنٹ (سی ٹی ڈی) پنجاب کے حکام کے مطابق خفیہ اطلاع کی بنیاد پر کارروائی کرتے ہوئے ساہیوال سے دو مبینہ دہشت گردوں کو حراست میں لیا گیا۔

سی ٹی ڈی حکام کا کہنا ہے کہ گرفتار افراد کی شناخت عبدالعزیز اور ولایت شاہ کے نام سے ہوئی ہے، جو پشاور کے رہائشی ہیں۔

حکام کے مطابق گرفتار ملزمان کے قبضے سے 4 کلو گرام بارودی مواد، 3 مبینہ آئی ای ڈیز، 3 کلاشنکوفیں، نقد رقم اور دیگر مبینہ دہشت گردی کا سامان برآمد کیا گیا ہے۔

سی ٹی ڈی کے مطابق ملزمان ساہیوال اور اوکاڑہ کے اضلاع میں دہشت گردی کی کارروائیاں کرنے کی منصوبہ بندی کر رہے تھے، تاہم بروقت کارروائی کے ذریعے ان کا منصوبہ ناکام بنا دیا گیا۔

حکام نے بتایا کہ گرفتار افراد سے مزید تفتیش جاری ہے تاکہ ان کے ممکنہ سہولت کاروں، ساتھیوں اور نیٹ ورک کے بارے میں معلومات حاصل کی جا سکیں۔

سی ٹی ڈی حکام کا کہنا ہے کہ ملزمان کے خلاف قانونی کارروائی شروع کر دی گئی ہے۔

واضح رہے کہ پاکستانی حکام ماضی میں بھی مختلف دہشت گرد حملوں میں بھارتی خفیہ ایجنسی ’را‘ کے ملوث ہونے کے الزامات عائد کرتے رہے ہیں، تاہم بھارت ان الزامات کی تردید کرتا ہے۔