شابان وادی میں ڈرون حملہ، ٹی ٹی پی پشین کا مبینہ گورنر 2 ساتھیوں سمیت ہلاک

پشین (ڈیلی اردو) بلوچستان کے شورش زدہ ضلع پشین کے قریب شابان وادی میں مبینہ ڈرون حملے کے نتیجے میں کالعدم تحریک طالبان پاکستان (ٹی ٹی پی) سے وابستہ تین افراد ہلاک ہونے کی اطلاعات ہیں، جن میں تنظیم کا پشین کے لیے مبینہ گورنر حافظ ہبت اللہ عمری بھی شامل ہے۔

ذرائع کے مطابق شابان وادی میں گزشتہ رات کیے گئے مبینہ یو اے وی حملے میں حافظ ہبت اللہ عمری اور اس کے دو ساتھیوں کو نشانہ بنایا گیا۔ ہلاک ہونے والے ایک شخص کی شناخت پشین کے رہائشی مصعب کے نام سے ہوئی ہے، جبکہ تیسرے شخص کی شناخت تاحال سامنے نہیں آسکی۔

حافظ ہبت اللہ عمری کے بارے میں بتایا گیا ہے کہ وہ ٹی ٹی پی کی جانب سے پشین کے لیے مبینہ گورنر کی حیثیت سے ذمہ داریاں انجام دے رہا تھا۔ اگر اس کی ہلاکت کی تصدیق ہوجاتی ہے تو اسے تنظیم کے مقامی ڈھانچے کے لیے اہم نقصان قرار دیا جاسکتا ہے۔

یہ کارروائی ایسے وقت میں سامنے آئی ہے جب بلوچستان میں دہشتگردوں کے خلاف سیکیورٹی کارروائیوں میں تیزی دیکھی جارہی ہے۔ شابان وادی بھی حالیہ عرصے میں دہشتگردوں کے مبینہ ٹھکانوں اور نیٹ ورکس کے خلاف کارروائیوں کا مرکز رہی ہے۔

ذرائع کے مطابق حملے اور اس میں ہلاک ہونے والے افراد کے حوالے سے مزید تفصیلات سامنے آنا باقی ہیں، جبکہ تیسرے شخص کی شناخت اور کارروائی کی مکمل نوعیت بھی واضح نہیں ہوسکی۔