شام : سابق نظام سے وابستہ جاسوسی نیٹ ورک کے خلاف کارروائیاں، 2 افراد گرفتار، دوسری سیل بھی پکڑی گئی

دمشق(ڈیلی اردو) شام میں داخلی سکیورٹی فورسز نے سابق نظام سے وابستہ مبینہ جاسوسی نیٹ ورک کے خلاف کارروائیاں تیز کرتے ہوئے دو افراد کو گرفتار کرنے کے ساتھ ساتھ صوبہ ادلب میں اسی نیٹ ورک سے منسلک ایک دوسری خفیہ سیل کا بھی سراغ لگا کر اس کے ارکان کو حراست میں لینے کا اعلان کیا ہے۔ شامی حکام کے مطابق دونوں کارروائیاں سابق نظام کے لیے مبینہ طور پر حساس معلومات جمع کرنے اور سکیورٹی سرگرمیوں سے متعلق نیٹ ورک کے خلاف جاری تحقیقات کا حصہ ہیں۔

ادلب میں باپ بیٹا گرفتار

شامی داخلی سکیورٹی کے مطابق صبحي نینال اور اس کے بیٹے شادی نینال کو مبینہ طور پر سابق نظام کے سکیورٹی اداروں کے لیے جاسوسی کرنے کے الزام میں گرفتار کیا گیا ہے۔

حکام کے مطابق تحقیقات میں انکشاف ہوا کہ صبحي نینال مبینہ طور پر ادلب، جسر الشغور، بنش، الاتارب اور حلب کے دیہی علاقوں میں فوجی مقامات، چیک پوسٹوں اور دیگر حساس تنصیبات کی نگرانی اور تصاویر بنانے میں ملوث تھا۔ سکیورٹی حکام کا دعویٰ ہے کہ وہ خفیہ کیمروں سے لیس موٹر سائیکل استعمال کرتا تھا اور بعض شہری و اہم مقامات کی معلومات اور جغرافیائی نشانات سابق نظام کے سکیورٹی اداروں کو فراہم کرتا تھا۔

شامی حکام کے مطابق ان معلومات کے بدلے رقم بھی وصول کی جاتی تھی اور بعض مقامات کو بار بار نشانہ بنائے جانے سے جانی و مالی نقصان ہوا۔

تحقیقات میں صبحي نینال کے بیٹے شادی نینال کے بھی مبینہ طور پر حساس فوجی معلومات فراہم کرنے میں ملوث ہونے کا دعویٰ کیا گیا ہے۔ حکام کے مطابق وہ ماضی میں حلب کے محاذوں پر ایک مسلح گروپ کے ساتھ کام کرچکا تھا اور اپنے والد کی جانب سے فراہم کردہ مواصلاتی آلات کے ذریعے فوجی مقامات کی معلومات، اہلکاروں کی تعداد، ہتھیاروں اور گاڑیوں سے متعلق تفصیلات منتقل کرتا تھا۔

شامی داخلی سکیورٹی نے کہا ہے کہ دونوں افراد کے خلاف تحقیقات اور قانونی کارروائی جاری ہے، جس کے بعد انہیں متعلقہ عدالت کے سامنے پیش کیا جائے گا۔

ادلب میں سابق نیٹ ورک سے منسلک دوسری سیل پکڑی گئی

دوسری کارروائی میں ادلب کی داخلی سکیورٹی فورسز نے محکمہ انسداد دہشتگردی کے تعاون سے سابق نظام سے وابستہ ایک مبینہ جاسوسی نیٹ ورک کی دوسری سیل کا سراغ لگانے اور اس کے ارکان کو گرفتار کرنے کا اعلان کیا ہے۔

ادلب کے داخلی سکیورٹی سربراہ بریگیڈیئر غسان باکیر کے مطابق نئی سیل کا تعلق اسی نیٹ ورک سے ہے جس کے ارکان کو رواں سال 15 جون کو گرفتار کیا گیا تھا۔ ان کا کہنا ہے کہ نئی کارروائی طویل نگرانی، معلومات جمع کرنے اور سکیورٹی فالو اَپ کے بعد عمل میں لائی گئی۔

حکام کے مطابق نئی گرفتار شدہ سیل کی سرگرمیوں، اس کے رابطوں اور نیٹ ورک سے وابستگی کے بارے میں مزید تحقیقات جاری ہیں، جبکہ تمام ملزمان کے خلاف قانونی کارروائی مکمل کرکے انہیں عدالت کے حوالے کیا جائے گا۔

شامی حکام نے جون میں گرفتار کیے گئے نیٹ ورک پر سابق نظام کے دور میں فوجی تنصیبات کی نگرانی، ان کی معلومات اور درست مقامات فراہم کرنے کے علاوہ جاسوسی اور دھماکہ خیز کارروائیوں میں معاونت کے الزامات عائد کیے تھے۔