شام: دمشق میں کارروائی، اسد دور کی معروف میڈیا شخصیت سنال الخضر گرفتار

دمشق(ڈیلی اردو) شام کے دارالحکومت دمشق کے نواحی علاقے میں سیکیورٹی فورسز نے کارروائی کرتے ہوئے سابق صدر بشار الاسد کے دور حکومت میں اہم میڈیا ذمہ داریاں انجام دینے والی صحافی سنال الخضر کو گرفتار کرلیا۔

شامی سرکاری ذرائع ابلاغ کے مطابق جمعرات کو کی جانے والی کارروائی میں سنال الخضر کے ساتھ کام کرنے والے بعض دیگر افراد کو بھی حراست میں لیا گیا ہے، تاہم گرفتار کیے گئے افراد کی تعداد اور شناخت سے متعلق مزید تفصیلات سامنے نہیں آئیں۔

سنان الخضر نے سابق شامی حکومت کے دور میں مختلف سرکاری اور میڈیا اداروں میں ذمہ داریاں انجام دیں۔ شامی سرکاری میڈیا کے مطابق وہ جنگی نامہ نگار کے طور پر بھی کام کرتی رہی جبکہ نیشنل ڈیفنس فورسز کے تحت قائم فوجی میڈیا شعبے کی سربراہی بھی ان کے فرائض میں شامل تھی۔

رپورٹ کے مطابق الخضر نے سابق حکومت کے دور میں وزیراعظم کے دفتر میں تعلقات عامہ سے متعلق ذمہ داری بھی سنبھالی تھی۔ یوں ان کا پیشہ ورانہ کردار سابق حکومت کے میڈیا اور سرکاری اداروں سے منسلک رہا۔

شامی حکام نے تاحال سنال الخضر کی گرفتاری کی مخصوص وجہ یا ان کے خلاف عائد کیے جانے والے الزامات کی تفصیلات جاری نہیں کیں۔ یہ بھی واضح نہیں کیا گیا کہ آیا انہیں کسی عدالتی کارروائی کے لیے متعلقہ اداروں کے حوالے کیا گیا ہے یا نہیں۔

حکام کی جانب سے مزید معلومات سامنے آنے کے بعد گرفتاری کی وجوہات اور دیگر زیر حراست افراد سے متعلق تفصیلات واضح ہونے کا امکان ہے۔