شمالی وزیرستان: محسن داوڑ نے جرگہ ممبران کے ذریعے خود کو قانون کے حوالے کردیا

اسلام آباد (ڈیلی اردو) خیبر پختونخوا کے قبائلی ضلع شمالی وزیرستان سے پی ٹی ایم کے رہنما اور ممبر قومی اسمبلی محسن داوڑ کو حراست میں لے لیا۔ ڈیلی اردو کے نمائندہ کے مطابق محسن داوڑ نے جرگہ ممبران کے ذریعے خود کو سیکیورٹی فورسز کے اعلی سطحی حکام کے حوالے کردیا۔

ذرائع کے مطابق پشتون قبائل، حکومت کے گرینڈ جرگہ اور ضلعی انتظامیہ نے پشتون قبائلی روایات کے مطابق جرگہ “نناواتے“ کر کے خڑ کمر واقع پر با قاعدہ معافی مانگ لی ہے اور جرگہ ننواتے میں اپنے ساتھ پشتون روایت کے مطابق 4 عدد دنبے ساتھ لائے تھے۔ حکومت اور جرگہ کے شدید اسرار پر دھرنا صرف رمضان شریف اور شہیدوں کے فاتحہ کی خاطر عید تک دھرنا ملتوی کیا گیا ہے۔

نمائندہ ڈیلی اردو کے مطابق شمالی وزیرستان کے منتخب نمائندے بیرسٹر محسن داؤڑ نے اعلان کیا کہ وہ خود عدالت کا سامنے پیش ہوکر حقائق پیش کریں گے اور دنیا کے سامنے ثابت کریں گے کہ کون جھوٹا اور کون سچا ہے۔ میرانشاہ میں دھرنے سے اپنے آخری خطاب میں محسن داؤڑ نے کہا کہ آج سے وزیرستان کا ہر جوان محسن داؤڑ اور علی وزیر ہے۔ ہم اپنے مطالبات کیلئے کھڑے رہیں گے اور پرامن احتجاج جاری رکھیں گے۔

یہ اعلان ایک ایسے وقت میں سامنے آیا ہے جب محسن داؤڑ وزیرستان کے علاقے خڑ قمر واقعے کے بعد سے میرانشاہ میں دھرنے دے بیٹھے تھے اور ادارے ان کو گرفتار کرنے کی کوشش کررہے تھے جبکہ جنوبی وزیرستان کے ایم این اے پہلے ہی قانون نافذ کرنے والے اداروں نے گرفتار کرکے عدالت میں پیش کیا ہے۔

محسن داوڑ کی گرفتاری کیسے ممکن ہوئی

کئی روز سے محسن داوڑ کی گرفتاری عمل میں نہ لائی جاسکی اور اس وقت گرفتاری سے حالات سخت کشیدگی کی طرف رہے تھے لیکن گزشتہ دو دونوں کے جرگوں اور بالخصوص شہید ہونے والوں کے گھروں میں نناواتے (معافی طلب کرنا یا معافی مانگنا) کے بعد حالات سنبھلنے میں مدد ملی جس کے بعد جرگہ میں فیصلہ کیا گیا کہ دھرنا عید تک ملتوی کردیا جائے گا تب تک حکومت کی طرف سے ان اقدامات کا جائزہ بھی لیا جائے گا جس میں متاثرہ افراد اور قوم کے مشران کو حکومت کی طرف سے یقین دہانی کرائی گئی ہے کہ ان افراد کو سخت سزا دی جائے گی جنہوں نے قانون کو ہاتھ میں لیا ہے اور ساتھ جرگہ نے فیصلہ کیا کہ محسن داوڑ گرفتاری دے گا۔

نناواتے کیا ہے؟

پشتون اور قبائلی معاشرے میں نناواتے بہت اہمیت کی حامل ہوتی ہے اور نناواتے اس وقت کی جاتی ہے جب کوئی فریق غلطی تسلیم کرتا ہے اور اس کا مطلب یہ بھی ہوتا ہے کہ غلطی تسلیم کرنے والا غلطی کا ازالہ کرے گا۔

سیکیورٹی ذرائع سے ٹی وی چینلز کو خبر دی ہے کہ وزیرستان سے قومی اسمبلی کے پشتون رکن محسن داوڑ کو گرفتار کر لیا گیا ہے۔

خیال رہے کہ ان کے خلاف بویہ چیک پوسٹ پر حملے کا مقدمہ درج کیا گیا تھا۔

واضح رہے کہ سیکیورٹی فورسز نے شمالی وزیرستان سے ہی قومی اسمبلی کے رکن علی وزیر کو چند روز قبل گرفتار کیا تھا اور وہ اس وقت محکمہ انسداد دہشت گردی (سی ٹی ڈی) کی تحویل میں ہیں۔

یاد رہے کہ شمالی وزیرستان کے تحصیل دتہ خیل کے علاقے خڑکمر میں اتوار کے روز سیکورٹی فورسز اور پشتون تحفظ تحریک کے کارکنوں کے درمیان جھڑپ ہوئی تھی۔ جھڑپ کے دوران سیکیورٹی فورسز کے پانچ اہلکار زخمی ہوگئے تھے جبکہ پی ٹی ایم کے 13 کارکن جاں بحق اور 45 سے زائد زخمی ہوئے تھے۔