شمالی وزیرستان میں جھڑپ، دو فوجی اور ایک دہشت گرد ہلاک

راولپنڈی (ک م) صوبہ خیبر پختونخوا کے قبائلی ضلع شمالی وزیرستان کے علاقے میر علی میں سیکیورٹی فورسز سے جھڑپ میں دو فوجی اور ایک دہشت گرد ہلاک ہوگیا۔

شمالی وزیرستان میں سیکورٹی فورسز کے چیک پوسٹ پر دہشت گردوں کے حملے میں دو فوجی ہلاک اور تین زخمی ہوگئے۔#NorthWaziristan #Pakistan

— Shabbir Hussain Turi (@ShabbirTuri) November 13, 2023

پاکستانی فوج کے شعبہ تعلقات عامہ (آئی ایس پی آر) کے مطابق شمالی وزیرستان کے علاقے میر علی میں سیکیورٹی فورسز اور دہشت گرد میں جھڑپ ہوئی۔

پاکستانی فوج کے مطابق فائرنگ کے شدید تبادلے میں سپاہی عبداللہ اور سپاہی سہیل ہلاک ہوگئے۔ جبکہ جوابی کارروائی میں ایک دہشت گرد بھی مارا گیا۔

آئی ایس پی آر کا بتانا ہے کہ علاقے میں ممکنہ دہشت گردوں کے خاتمے کے لیے کلیئرنس آپریشن جاری ہے۔

ترجمان پاک فوج کا کہنا ہے کہ سیکیورٹی فورسز دہشت گردی کے خاتمے کے لیے پرعزم ہیں، بہادر جوانوں کی قربانیاں ہمارے عزم کو مزید تقویت دیتی ہیں۔

واضح رہے کہ گزشتہ ماہ شمالی وزیرستان میں سکیورٹی فورسز سے فائرنگ کے تبادلے میں دہشتگرد عظیم اللہ عرف غازی مارا گیا تھا۔

آئی ایس پی آر کا کہنا تھا کہ ہلاک دہشتگرد سکیورٹی فورسز کے خلاف کارروائیوں اور بے گناہ شہروں کے قتل میں ملوث تھا، اہل علاقہ کی جانب سے فوجی آپریشن کو سراہا گیا تھا۔

یاد رہے کہ کالعدم تحریک طالبان (ٹی ٹی پی) کی جانب سے گزشتہ برس نومبر میں حکومت کے ساتھ جنگ بندی ختم کرنے کے اعلان کے بعد پاکستان میں خاص طور پر خیبرپختونخوا اور بلوچستان میں دہشت گردی کے واقعات میں اضافہ ہوا ہے۔

گزشتہ روز خیبرپختونخوا کے ضلع ٹانک کے علاقے کڑی شاہ نور میں پولیس پر دہشت گردوں کے حملے میں ایک اسٹیشن ہاؤس افسر (ایس ایچ او) سمیت 3 پولیس اہلکار ہلاک اور ڈپٹی سپرنٹنڈنٹ آف پولیس (ڈی ایس پی) سمیت 5 اہلکار زخمی ہو گئے۔

اسی طرح 6 نومبر کو خیبرپختونخوا کے ضلع خیبر میں سیکیورٹی فورسز کی کارروائی کے دوران دہشت گردوں سے فائرنگ کا تبادلہ ہوا، جس کے نتیجے میں لیفٹیننٹ کرنل سمیت پاک فوج کے 4 اہلکار ہلاک اور 7 کمانڈوز زخمی ہوگئے تھے۔

قبل ازیں 5 نومبر کی رات ڈیرہ اسماعیل خان میں 2 پولیس چوکیوں پر دہشت گردوں نے حملہ کیا تھا تاہم پولیس نے بروقت جوابی کارروائی کرتے ہوئے حملہ ناکام بنا دیا تھا۔

اس سے ایک روز قبل ڈیرہ اسماعیل خان کے کلاچی تھانے کی حدود میں روڑی کے علاقے میں بھی ایک چوکی پر حملہ کیا گیا تھا، جس میں ایک پولیس اہلکار زخمی ہوگیا تھا۔

4 نومبر کو پاکستان ائیرفورس ٹریننگ ایئربیس میانوالی پر دہشت گردوں نے حملے کی کوشش کی تھی جسے پاک فوج نے ناکام بنادیا اور کلیئرنس آپریشن میں تمام 9 دہشت گردوں کو ہلاک کردیا تھا۔ جبکہ اس حملے میں 7 اہلکار بھی ہلاک ہوگئے تھے۔

3 نومبر کو صوبہ بلوچستان کے ضلع گوادر میں سیکیورٹی فورسز کی گاڑی پر دہشت گردوں کے حملے میں پاک فوج کے 14 اہلکار ہلاک ہوگئے تھے۔

قبل ازیں خیبر پختونخوا کے ضلع ڈیرہ اسماعیل خان میں ٹانک اڈہ کے قریب پولیس پر کیے گئے بم دھماکے میں 7 افراد ہلاک اور 20 افراد زخمی ہوگئے تھے۔

یکم نومبر کو بلوچستان میں ضلع ژوب کے علاقے سمبازا میں سیکیورٹی فورسز نے خفیہ اطلاع کی بنیاد پر کارروائی کرکے 6 دہشت گردوں کو ہلاک کردیا تھا۔

سیکیورٹی فورسز نے 8 نومبر کو پاک-افغان سرحد کے قریب خیبرپختونخوا کے ضلع چترال میں کارروائی کی تھی جہاں فائرنگ کے تبادلے کے دوران 2 دہشت گرد ہلاک اور 4 زخمی ہوگئے تھے۔