شمالی وزیرستان میں جھڑپ، میجر ہلاک، جوابی کارروائی میں 5 دہشت گرد مارے گئے: آئی ایس پی آر

راولپنڈی (نمائندہ ڈیلی اردو) پاکستان کے شورش زدہ صوبہ خیبر پختونخوا کے قبائلی ضلع شمالی وزیرستان میں سیکیورٹی فورسز اور دہشت گردوں کے درمیان جھڑپ کے نتیجے میں پاک فوج کا ایک میجر ہلاک جبکہ 5 دہشت گرد مارے گئے ہیں۔

پاکستان فوج کے شعبۂ تعلقاتِ عامہ (آئی ایس پی آر) کے مطابق سیکیورٹی فورسز نے یکم اگست 2026 کو شمالی وزیرستان کے علاقے رزمک میں خفیہ اطلاعات کی بنیاد پر آپریشن کیا، جہاں کالعدم تنظیم فتنۃ الخوارج سے تعلق رکھنے والے دہشت گردوں کی موجودگی کی اطلاع ملی تھی۔

آئی ایس پی آر کے بیان کے مطابق آپریشن کے دوران سیکیورٹی فورسز نے دہشت گردوں کے ٹھکانے کو مؤثر انداز میں نشانہ بنایا، جس کے نتیجے میں 5 دہشت گرد ہلاک ہوگئے۔

بیان میں کہا گیا ہے کہ کارروائی کے دوران دہشت گردوں کے ساتھ شدید فائرنگ کا تبادلہ ہوا، جس میں پاک فوج کے میجر حافظ احسان الٰہی ہلاک ہوگئے۔

آئی ایس پی آر کے مطابق 34 سالہ میجر حافظ احسان الٰہی، جن کا تعلق ضلع میانوالی سے تھا، آپریشن کے دوران اگلی صفوں میں رہتے ہوئے اپنی ٹیم کی قیادت کر رہے تھے۔

پاکستان فوج کے مطابق ہلاک ہونے والے دہشت گرد سیکیورٹی فورسز، قانون نافذ کرنے والے اداروں اور شہریوں کے خلاف متعدد دہشت گرد کارروائیوں میں ملوث تھے۔

آئی ایس پی آر نے دعویٰ کیا ہے کہ ہلاک دہشت گردوں کے قبضے سے اسلحہ، گولہ بارود اور دیگر جنگی سامان بھی برآمد کیا گیا ہے۔

بیان کے مطابق علاقے میں مزید دہشت گردوں کی موجودگی کے خدشے کے پیش نظر کلیئرنس آپریشن جاری ہے تاکہ باقی ماندہ عناصر کا خاتمہ کیا جا سکے۔

پاکستانی حکام کالعدم تحریک طالبان پاکستان (ٹی ٹی پی) اور اس سے منسلک گروہوں کے لیے عموماً "فتنۃ الخوارج" کی اصطلاح استعمال کرتے ہیں۔