شمالی وزیرستان میں سیکورٹی فورسز کا انٹیلی جنس آپریشن، 6 مبینہ دہشت گرد ہلاک

راولپنڈی (ڈیلی اردو) صوبہ خیبر پختونخوا کے قبائلی ضلع شمالی وزیرستان کے علاقے میر علی میں سکیورٹی فورسز کے انٹیلی جنس بیسڈ آپریشن میں ایک فوجی اور 6 مبینہ دہشت گرد ہلاک ہو گئے۔

پاکستانی فوج کے مطابق میر علی کے علاقے حیدر خیل میں مارےگئے دہشت گردوں سے اسلحہ اور گولہ بارود بھی برآمد ہوا۔ ہلاک دہشت گرد تخریب کاری اور شہریوں کی ٹارگٹ کلنگ میں ملوث تھے۔ فائرنگ کے تبادلے میں سپاہی عبدالحکیم بھی ہلاک ہوگیا۔

آئی ایس پی آر کے مطابق علاقہ مکینوں نے آپریشن کو سراہا اور دہشت گردی کے خاتمے کیلئے تعاون کا اظہار کیا۔

نمائندہ ڈیلی اردو کو مقامی لوگوں نے بتایا کہ سیکورٹی فورسز کے آپریشن میں تین بے گناہ افراد بھی ہلاک ہوگئے۔ تاہم فوج نے دعویٰ کیا ہے کہ تمام ہلاک افراد دہشت گرد تھے۔